Actualmente 33% di Intensive Care Unit (ICU) ta ocupa na Aruba

ORANJESTAD – Aruba ta bay cuminsa prepara pa e asina yama ‘worst case scenario’ di COVID19. Asina minister di salud Dangui Oduber a bisa diasabra.  Mientrastanto den un entrevista cu prome minister Evelyn Wever Croes, e ta considera un ‘worst case scenario’ ora cu e capacidad di intensive care yena. Ora cu esaki sosode, e por yega na e punto cu docternan tin cu dicidi ken ta ‘biba y ken ta muri’, manera cu a sosode na p.e. Italia y Francia mas tempran e aña aki. 

COMUNICADO

For di un comunicado, tabatin yen di informacion interesante di cual loke a hala atencion tabata cu ‘ Lo haci peticion na staatssecretaris pa extra Aspen Medical International (AMI) personeel pa nos cuminsa prepara pa e worst case scenario’. Manera raporta caba, esey ta ora cu ICU yena. Nos a raporta tambe cu e ICU su capacidad ta 21 unidad cu su personal., Segun e comunicado di diadomingo, ‘na varios ocasion nos a bisa cu nos por schaal op te cu 33 ICU. Actualmente 33% di ICU ta ocupa

E SCENARIO

‘Nos ta bai cuminsa prepara nos mes pa e scenario aki paso pa prepara pa e scenario aki mester haci peticion na Hulanda pa yuda nos cu pa mas personal. Pa por schaal op te cu 33 ICU mester extra personal. Mes momento mester enfatisa cu nos no ta spera cu nos lo yega eynan’.

AUMENTA PERSONAL

Segun e comunicado, actualmente tin 23 persona di AMI na hospital. ‘Nos a acorda cu Hulanda cu por expande esaki te 40. Debi na e situacion actual nos a pidi caba pa expande esaki. Tin 17 na caminda pa reenforza lo tey pa aki 2 siman. Muy probabel lo bai tin mester mas personal pa e opschaling te cu 33 ICU’, e comunicado a sigui bisa.