Wever: Gobierno no ta ‘sugar coat’ noticianan di COVID19

ORANJESTAD – Gobierno di Aruba (lesa:premier Evelyn Wever Croes), no ta di acuerdo cu e ponencia di e portal aki cu tin e percepcion cu gobierno y e COVID crisis team ta ‘sugar coat’ y downplay e noticianan ‘negativo’ di COVID19 pa Aruba. Sugar coat, ta e terminologia cu ta usa ora cu kier usa terminonan mas suave pa describi un situacion fastioso. Asina Wever a sigura e portal aki diabierna durante un entrevista basta extenso. “Ami ta wak e juist no. Mi ta purba di ta hopi serio, y enfatisa y si mester, mi ta hisa mi voz, pero semper laga tur hende cu e sentimento di speransa cu nos ta bay sali di esaki” Wever a sigui bisa. 

SUGAR COAT

E pregunta a bin a raiz di e forma con for di comienso tabata raporta e noticianan di COVID. Entre otro tabata cuminsa na menciona e noticia y cifranan positivo prome, y djey bay pa esnan mas negativo. De hecho tabatin un tempo cu a cuminsa cambia e proceso di raporta, y bisa prome e cifranan di testnan negativo, siendo cu tur caminda ta raporta prome e casonan total, sigui pa e casonan nobo positivo y despues e resto. Na caminda a bin cambia esaki bek atrobe. 

TUR COS BOU CONTROL?

Loke a bira casi un custumber y cu despues riba medionan social a bira un lema sarcastico, tabata e dicho di cu ‘pero tur cos ta bou di control’. Pues ni maske con malo e noticia tabata, tur cos tabata ainda bou di control. Na comienso a haci te hasta e fayo di asina cu e cifranan cuminsa baha, referi mesora na e hecho cu a logra ‘flatten the curve’. Un ehempel amargo tabata den e di dos ola, na augustus ora cu diripiente a yega 9 caso so positivo pa un dia, pa despues esaki surpasa 100 e siguiente dia. A bira mas cauteloso y for di e dia ey, ta evita di menciona cu ‘ta logrando pa baha e curve’, pasobra e cifranan ta fluctua mucho. 

Tabatin dianan cu gobierno tabata anuncia solamente cosnan positivo, manera p.e. un dia cu a menciona solamente cu un cantidad di persona a ‘recupera’, sin menciona cu tabatin personanan cu a fayece e dia ey tambe. Aworaki, enberdad aunke tin menos ‘sugar coating’, ta raportando un poco mas ‘responsabel’, aunke aki aya, e situacion ta keda tendencioso. 

NO MESTER SUGAR COAT

Wever Croes tabata di acuerdo cu e portal aki cu ‘no mester sugar coat, no mester downplay’, sino cu ‘mester bisa e cos mane cu e ta. “E cifranan mes ta papia pa nan mes tambe’. Wever a sigui bisa.