Warda Costa ta lamenta menasa contra su trahadonan riba red social

ORANJESTAD - Ultimo dianan riba social media tin diferente mensahe tocante trahadornan di Wardacosta di Caribe. E mensahenan ta ser dirigi principalmente na e trahadornan di Kustwacht su steunpunt na Aruba caminda cu tin hasta menasa direccion di e trahadornan. Wardacosta den un comunicado ta reacciona bisando cu e ta lamenta sinseramente ku e mensahenan riba social media ta tacha e trahador di Wardacosta personalmente y ta daña e reputaccion di Wardacosta sin un base funda. E no ta bisa si, pakico tin menasa contra e personal. 

Wardacosta ta sigura cu e ta un organisacion profesional cu ta traha abase di regulacionnan local y ta mantene ordo publico a base di su Rijkswet Kustwacht. “ E trabounan di Wardacosta ta ser ehecuta na un manera integro, profesional y sin haci diferencia den persona”. Directiva di Wardacosta ta para clave tras di su trahadornan y no ta acepta ningun sorto di menasa den direccion di su trahador cu ta haci nan trabou na un manera digno. “ Wardacosta ta e partner di seguridat riba laman pa Aruba y lo keda mantene ordu publico y controlnan riba laman a base di leynan vigente local” e comunicado ta finalisa bisando.