Premier Rutte: Nos no ta negosha nos proposicion!
DEN HAAG – “Nos no ta negosha nos proposicion”. Na palabra prome minister Hulandes Mark Rutte na e portal Caribisch Netwerk su reportero. E ta un diferente tono cu colega politico Raymond Knops a bisa recientemente (diaranson ainda durante un debate di Tweede Kamer). E declaracionan di Rutte tabata prome cu e la drenta e Rijks Minister Raad diabierna mainta.
NEGOSHA OF NO?
E declaracion awe mainta di Rutte ta bin como un ‘sorpresa’ ya cu tanto Knops como premier di Aruba Evelyn Wever Croes a sigura cu ta ‘negoshando’ cu otro. Ambos partido si tin un diferente forma di mira esaki. Aruba kier cambia frasenan completo, mientras cu Hulanda kier djis haci algun aclariacion aki aya (puntjes op de i). Pero te cu ayera, tanto Knops como Wever tabata papia di ‘negosha’. “Nos no ta negoshando nos proposicion. Esaki ta un proposición opcional. (Nan) tin cu wak kico nan ta haci cu ne” Rutte a bisa cu firmeza sin embargo, poniendo duda riba kico ta sosodiendo.
SORPRENDI
Los di e declaracion ey, Secretario di estado Hulandes Raymond Knops a keda ‘extremadamente’ sorpendi di e contenido di e discurso nacional di premier Wever Croes di diahuebs anochi. Asina e la bisa e reportero di Caribisch Netwerk diabierna mainta na Den Haag. Knops a keda sorprendi cu Aruba no ta haya su mes den e condicionan pa e di tres prestamo di emergencia. “Nos a papia durante dos luna, te hasta durante mi vacantie (na Bonaire). Si tarda mucho hopi, e ora, sigur, e terminonan (di e proposicion) lo no keda mescos” Knops a bisa, dunando un indicacion caba di kico por spera. Pues, cu e tempo cu Aruba a ‘gana’ pa negosha mientras cu ta haya ayudo financiero otro caminda, lo por cost’e mas caro a lo largo. Segun e gabinete Hulandes, lo tuma algún siman mas prome cu lo por traspasa e fondonan necesario y esey ta nifica cu lo dura un poco mas prome cu e islanan yega na un respectivo acuerdo cu Hulanda.
AYUDO SIN HULANDA
Inicialmente e informacion oficial di gobierno tabata bisa cu Aruba lo a bay subi mercado internacional pa fia placa. Esey tabata un ekibocacion di e equipo di PR di gobierno, cu a keda coregi. Ta trata di un deal di consorcionan local cu lo fia gobierno e placa necesario. E coreccion ey ta importante, pasobra basa riba e prome información oficial, Hulanda a reacciona ya cu pa un préstamo riba mercado internacional, Aruba mester di aprobacion di Hulanda. Knops a bisa diabierna mainta cu si ta un préstamo internacional, y cu mester di ayudo di Hulanda, e por tin consecuencia tambe pa e pakete di condición cu ya tabata riba mesa na juli. No ta conoci si, si e kier men cu independiente di e hecho cu si e ta un prestamo local of internacional, e lo tin impacto riba e negosacionan. Fuente Caribisch Netwerk.
Potret cortesia di e portal www.trouw.nl
Directora di Arubahuis a atende “Kennismissie” di OC&W na Aruba y Curaçao
DEN HAAG – Directora di Arubahuis a mr. Joselin Croes a participa na e “Kennismissie” di Minister di OC&W Robbert Dijkgraaf na Curaçao y Aruba. Na Aruba e punto central tabata con educacion ta conecta cu e mercado laboral: e situacion actual, pero principalmente con e demanda di enseñansa ta cuadra cu e necesidad di e mercado laboral.
Pareha Real Spaño a inicia bishita na Hulanda, cu participacion di prinses Amalia
AMSTERDAM – Rey di Spaña Felipe y Reina Letizia a cuminsa na nan bishita oficial di dos dia na Hulanda. E bishita a cuminsa riba plaza Dam unda cu tabatin tiro di saludo riba e tereno di marina. No a usa municion sino mas bien blanco. E diferencia di e bishita aki ta cu e biaha aki prinses Amalia tambe ta inclui den e bishita. Awe nochi e ta forma parti di e cena Real na honor di e pareha Real Spaño. Amalia tin un relacion special cu Spaña ya cu e la pasa un aña eynan recien debi na motibonan di seguridad pa su bida. Mientrastanto e la bolbe Hulanda pa biba y sigui studia. Pero e situacion di seguridad y menasa contra dje, no a kita ainda.
Decenas di buelo anula na Schiphol debi na fuerte rafaga di biento
SCHIPHOL – Decenas di buelo a keda anula dialuna na aeropuerto Schiphol di Hulanda debi na mal tempo. Ta primordialmente buelonan dentro di Europa mes. Buelonan pa Caribe Hulandes manera Aruba no a keda afecta. Ta trata di 90 buelo cu a keda anula, di cual mayoria ta di KLM. Ta spera rafaga di biento fuerte cu posibel mal tempo, segun un vocero di e aeropuerto.
Aunke interes ta minimo riba e islanan, lo sigui tene conferensia di Reino riba clima 2025
W’STAD/DEN HAAG - Minister Hulandes demishonario di Klima i Energia, Rob Jetten a anunsiá durante un reunion di e komishon fiho di Relashonnan den Reino di parlamento Hulandes ku na 2025 ta organisá e di dos konferensia di klima di reino na Kòrsou. Esaki despues ku e promé konferensia a tuma lugá na mei 2023 na Aruba. El a katalogá e promé konferensia sumamente eksitoso ku partisipashon di diferente pais den region. E ta interesante mirando cu na mei na Aruba Jetten a informa Noticiacla cu e interes pa asuntonan di Clima ta casi nulo, pasobra tin problemanan mas importante cu esey pa atende. Asina mes, ta sigui tene e conferencianan.
Na Hulanda partidonan kier keda cla cu formacion di gobierno mitar di mei
DEN HAAG – Negosacionan pa forma gobierno nobo na Hulanda ta continua awe. E lidernan di e 4 partido ta hunto prome biaha cerca e informado. E intencion ta pa logra un acuerdo pa mitar di luna di mei di e aña aki ainda. Pero na final di e combersacion, Geert Wilders di PVV no por a sigura esaki ainda. Partidonan ta hopi positivo pa e progreso, pero ainda no por bisa si ta logra e meta menciona. Algun medio ta bisa cu e combersacionan ta bayendo hopi lento, pero e partidonan ta desmenti esey. E parti financiero ta e parti mas dificil pa atende. Na November di aña pasa tabatin eleccion y a cuminsa negosha. Ya ta bayendo pa 5 luna di formacion.
Inicio programa di investigacion cientifico internacional di pasado di sclabitud
ORANESTAD - E pasado di sklabitut kolonial di Hulanda i su impakto a forma diferente pais rònt mundu profundamente. Tòg e konosementu ku ta disponibel tokante e pasado di sklabitut kompartí akí ta skirbí partikularmente for di perspektiva kolonial. Pa enrikesé nos perspektiva, minister Dijkgraaf (Enseñansa, Kultura i Siensia) ta inisiá un koperashon global di sientífikonan riba e tópiko akí awe na Aruba. Esei el a anunsiá awe durante un mishon di konosementu den Karibe.
Follow NoticiaCla
