Faltando respet pa bandera di Aruba

ORANJESTAD - Pa varios dia, si no ta siman, e banderanan  di Aruba ta bulando riba rotonde na Aeropuerto. E banderanan a hala hopi atencion mirando cu a reemplasa tur e banderanan di varios paisnan pa pone esun di Aruba. Ultimo biaha cu a haci esaki, sin cu tabata un dia nacional manera 18 di maart of dia di Betico, tabata pa bishita di Prome Minister Mark Rutte. E hecho cu e siman aki tin reunionan parlamentario di Reino por ta un motibo pero esaki ta e siman aki so, siendo cu e banderanan ta bulando asina for di prome cu fin di aña. Investigacion cu NoticiaCla.com a haci, no por a saca mucho afo. Aeropuerto a sigura NoticiaCla.com cu no ta nan responsabilidad y cu tin cu check cu gobierno. Aya tambe, cos no ta mucho lew ya cu ta wordo manda di cashi pa muraya. A puntra minister di Cultura pero no a haya un respuesta tampoco. 

Prome a cuminsa kita algun bandera, y a wordo bisa cu esey ta pasobra cierto palonan di bandera mester a haya un turno di mantencion. Despues a kita tur bandera parew, pa algun dia, pa despues reemplasa nan cu e bandera di Aruba. Riba e potret por mira con un bandera ta bula tur kibra, los, faltando respet na nos bandera, y visible pa tur hende cu yega nos isla y bandona nos isla.