WOW Aruba cu donacion na ‘Happy To Give Back’

WOW Aruba cu donacion na ‘Happy To Give Back’

Posted on 09/11/2020 11:41 am AST | Updated on 09/11/2020 11:42 am AST

ORANJESTAD - Durante siman di 24 pa 28 di Augustus miembronan di Women empOwering Women a organisa e ‘WOW Gives Back Workout Challenge’ cu e meta di recauda fondo pa e iniciativa di CEDE Aruba ‘Happy To Give Back’. 

‘Happy To Give Back’ ta yuda banconan di cuminda y gruponan vulnerabel den nos comunidad por medio di donacion.  

Nan meta tabata pa organisa e ‘WOW Gives Back Workout Challenge’ cu e intencion di promove actividad fisico entre miembronan y comunidad, y na mes momento aporta na un causa cu merece su atencion door di e crisis actual. 

Pa 5 dia durante e siman aki cada miembro lo mester a completa un plan di ehercicio. Cada ehercicio tabata tin un balor minimo di AFL. 20,00 unda cu mester a busca un sponsor diario y asina yega na meta di AFL. 100,00 na final di siman pa cada miembro. 

Por medio di e ‘WOW Gives Back Workout Challenge’ e 38 miembro hunto cu sosten di famia, amistades y diferente compania local a logra recauda e bunita suma di AFL. 6.588,00 y asina contribui na e causa aki. 

Nan ta hopi satisfecho y contento cu e aprecio pa e iniciativa aki di nos miembronan, sponsors y CEDE Aruba. E ta nan meta pa sigi empodera nos sernan femenino pa hasi impacto positivo den nos comunidad. 

 

  • Powered by SETAR