Wever: Awor Hulanda a pone varios ultimatum irealistico pa Aruba cumpli cu ne awor

ORANJESTAD – Ni si Aruba firma un acuerdo cu Hulanda awor, e lo no por cumpli cu e condicionan pa haya e di tres tranche (fiansa pa e sosten di likides). Asina prome minister Evelyn Wever a bisa diabierna mainta den un entrevista radial cu Hans Geerman. Despues cu ayera nochi a bira conoci cu Aruba no ta firma awe cu Hulanda y cu Hulanda a mas bien pone 'extra condicion' pa Aruba haya placa, tabata awe mainta cu e mandatario a duna mas informacion riba e tema. Segun Wever, diripiente awor Hulanda a pone varios deadline pa cumpli cu ne relaciona cu e deal, cu dificilmente Aruba lo logra. Y si e no logra, e (Aruba) no ta haya e placa. 

DEADLINE

Segun Wever, Hulanda a haci cierto cambionan relaciona cu CAFT pero no a bay den mucho detayes, pero a mustra tambe cu Hulanda awor a pone diferente deadline pa Aruba cumpli cu ne den e acuerdo, y algun di nan ta hopi cerca cu dificilmente por cumpli. Entre otro a menciona e fecha di 15 di September proximo, esta otro siman, tambe uno dia 1 di October proximo. Y asina tin mas. Pero segun Wever, ta imposibel pa cumpli cu nan y si no cumpli, no ta haya e placa. Pues den cierto sentido, ni si a firma awe, lo no a logra cumpli y lo no a haya e placa, manera cu por a compronde di e entrevista awe mainta. 

FIANSA INTERNACIONAL?

E mandatario mientrastanto a clarifica awe mainta pa e portal aki cu e fiansa cu nan a logra y ta logrando manera menciona diahuebs anochi den e discurso nacional, ta uno local y no internacional. E pr team di gobierno a haci un ekibocacion y a pone cu ta un prestamo internacional Aruba lo ta trahando ariba, pero esaki no ta corecto. Ademas, pa un prestamo internacional, Aruba mester di aprobacion di Hulanda, y esey lo no sosode aworaki. Minister Xiomara Maduro tambe a coregi e informacion cu ta un prestamo local cu gobierno di Aruba ta trahando ariba, pero no a bisa ken, cuanto ni bou di cuanto interes esaki lo bin.