Wever: Aruba no ta firma cu Hulanda pero ta sigui negosha

ORANJESTAD – Aruba no ta firma un acuerdo cu Hulanda ainda, sino mas bien ta bay sigui negosha. Ademas Aruba lo finalisa un deal financiero cu inversionistanan local pa percura e rosea financiero temporalmente. Asina prome minister Evelyn Wever a bisa diahuebs anochi durante un discurso nacional. E tema tabata COVID19 y e acuerdo pendiente cu Hulanda. 

KICO A PASA

Wever a splica cu siman pasa diabierna Aruba a haya un otro sorpresa di Hulanda, unda cu riba 4 di September, a bin compronde cu tin mas condicion y compromiso cu Hulanda a impone sin cu Aruba tabata na altura. Puntonan cu Aruba no por tabata di acuerdo cu ne. Entre otro, cu e suma cu Aruba lo mester a haya pa cubri 3 luna, e 204 miyon florin, lo awor keda reparti riba 5 luna. Esey ta nifica cu e suma no ta yega y ta crea un otro buraco financiero di riba 150 miyon euro. Esey a pone cu dificilmente Aruba por a bay di acuerdo cu e deal aki. A pone e ora cu a busca otro alternativa y a parce di a haya inversionistanan internacional cu ta dispuesto pa yuda Aruba. Cu esaki, Aruba ta haya fondo pa e proximo dos lunanan aki, mientras cu ta sigui deal cu Hulanda. E ayudo di e inversionistanan tabata necesario pasobra tanten cu no firma cu Hulanda, Aruba lo no a haya fondo. Cu e ayudo di e inversionistanan ta cubri e buraco extra crea pa Hulanda su cambio di condicion. Esaki kier men cu Aruba lo no firma e siman aki mas cu Hulanda, cu ta nifica cu e no ta haya e placa awor. Pero e placa di e inversionistanan, lo yuda cubri e buraco di e proximo dos lunanan. No a bisa si ken e inversionistanan ta, ni cuanto placa e inversionistanan lo inverti. A menciona cu e deal lo keda cla den e proximo dianan. 

INFORMA 

Wever a bisa cu el a informa Parlamento, lidernan politico y gremionan riba e decision tuma y e situacion ultimo aki cu a surgi.  Lesa e carta y e documentonan AKI