Encuesta ta sugeri minister president firma acuerdo cu Hulanda

ORANJESTAD – Segun e ultimo encuesta di noticiacla.com, minister president di Aruba Evelyn Wever Croes mester acepta e condicionan cu Hulanda a pone (manera cu e ta ) pa por ricibi e di 3 tranche pa ayudo di likides. Esaki no obstante cu documentonan ta indica cu e ta temporalmente mishi cu nos autonomia. Un total di 1756 persona a participa den e encuesta durante tres dia largo. E encuesta ta haci den cuadro di e decision cu mester wordo tuma e siman aki pa Aruba haya e placa manera stipula (ayudo di likides). E encuesta aki tabata uno mas general mientras cu algun tempo pasa a tene un encuesta unda cu a pidi pa dicidi riba e contenido specifico detaya. 

E CONTENIDO?

Mayoria di esnan cu a participa, a indica cu nan conoce e contenido di e proposicion y asina mes ta urgi minister president pa firma e acuerdo manera e contenido a bin, pues sin e cambionan cu ta negoshando pe. E mayoria aki, den e caso aki ta representa 1115 persona (63.53%) y di e cantidad aki 32% ta bin di Savaneta. Pa loke ta edad, e grupo cu menos conoce e contenido, ta esun di 65 aña y mas halto cu ta 75%. Tur otro conoce e contenido, di cual e grupo cu mas a educa nan mes den e parti aki ta esun di 55 pa 64 aña. Mes momento, riba e pregunta cu si ta haya cu e contenido ta atacha nos autonomia, mayoria a bisa cu si. Aki atrobe Savaneta ta mas grandi, y ta representa 88%. Mester remarca cu Hulanda a bisa na varios occasion cu nan ta conciente cu e autonomia por ta atacha, pero temporal, durante periodo cu e leynan di reino ta na vigor. Cu bista riba esaki, a inclui e parti ey pa refleha esey. A haci e pregunta e ora si, conociendo e contenido, bo ta haya cu esaki ta atacha nos autonomia. Mayoria (78.66%) cu ta representa 1304 persona cu a participa den e encuesta, a bisa cu enberdad e contenido ta atacha e autonomia. Pero, mes momento, mayoria di e grupo ey, (927 persona cu ta representa 56.63%) ta bisa cu esaki ta temporalmente, y manera indica esaki ta bin di Savaneta. Un total di 333 persona (cu ta 20.34%) a bisa cu e condicionan no ta atacha nos autonomia. 

?

Manera ta conoci, Parlamentonan di e islanan CAS (Corsou, Aruba y St Maarten), a manda un carta di protesta pa prome minister di Hulanda Mark Rutte siman pasa riba e contenido di e proposicion cu Hulanda a manda. Sinembargo, mientras cu pa ley, Parlamento legalmente ta e representantenan eligi di pueblo di Aruba, mayoria di esnan cu a participa den e encuesta aki, no ta haya cu Parlamento por papia den nan nomber. Durante e encuesta, a separa e grupo den esnan cu ta contra of ta pro, y si esaki ta cu of sin conocemento di e contenido di e carta cu e tres Parlamentonan a manda pa Hulanda. E mayoria, un total di 1134 persona (64.73%) a bisa cu nan no ta di acuerdo cu e carta aki y ta haya cu Parlamento no por representa nan. Di e grupo aki 52% ta di Noord y esnan cu a bisa si, cu por representa nan ta Sta Cruz cu 32%. Un total di 593 persona (33.85%) a bisa cu nan ta bisa no na Parlamento, aunke nan no conoce e contenido di e carta. Un grupo menos grandi di 390 persona (19.17%) ta aproba e carta di cual 108 (6.16%) no conoce e contenido di e carta. Un cantidad di 228 a bisa cu nan no conoce e carta y como tal no tin un reaccion si e ta bon of malo. Hecho ta cu mayoria di esnan encuesta, no ta aproba e accion aki di Parlamento. 

CONCLUSION

E conclusion ta cu entre esnan encuesta, e mayoria absoluto kier pa Prome Minister Evelyn Wever firma e proposicion di Hulanda, manera cu Hulanda a mande, no obstante e hecho cu ‘temporalmente’ e por atacha e autonomia di Aruba. Remarcable ta cu un dia anterior, durante un debate na Hulanda entre secretario di estado Hulandes Raymond Knops y miembronan di Tweede Kamer riba e tema aki, a bisa cu enberdad e paisnan Aruba, Corsou y St Maarten tin autonomia riba papel, pero no den practica, pasobra nan no por carga esaki. Y ta netamente e proposicion manera cu Hulanda a presenta, ta percura pa e islanan menciona, ‘built up’ e situacion di e islanan pa na final di e proceso, e paisnan por tin nan autonomia bek den practica.