Croes: No tin intencion pa para Sociaal Crisis Plan otro aña

ORANJESTAD – Contrario na e plan original, gobierno a dicidi cu Social Crisis Plan no ta stop otro aña mas. Por lo menos esey ta e intencion. Asina minister di Asuntonan Social Glenbert Croes a contesta noticiacla.com diahuebs mainta durante un conferencia di prensa. E contesta ta a base di e pregunta kico ta pasa otro aña ora cu e leynan cu ta sostene e plan, vence. 

E LEY

E intencion berdad tabata inicialmente na 2018, pa esaki bira un plan di 2 aña, pa cual a traha e leynan respectivo cu ta vence na 2021 consecuentemente. Pero na caminda, mirando e trabou y e logronan, e mandatario a bisa cu e intencion ta pa prolonga esaki y haci e SCP e vehiculo pa por destina fondonan inmediato pa casonan social di emergencia. E fondo a wordo lanta na 2018 a raiz di e tragedia di e dos criaturanan cu a wordo asesina na 2017 pa nan padrastro. 

LOGRONAN 

Ora cu a puntra e mandatario pa e logronan, e la mustra cu ta ora cu yega na final di e trabou di e 31 proyectonan, posiblemente otro aña, lo por mira e impacto cu e proyecto aki tabatin. Pero, si tin cu tuma e hecho di p.e. e tempo di espera (wachttijd) na Bureau Sostenemi, a logra baha esaki cu 60% caba, (tabatin entre 250 pa 300 melding pa aña), e ta considera esaki un meetpaal cu cual por midi cierto exito. E mandatario a bisa si cu e ta convenci cu si no a bin cu e SCP, e tipo di casonan lo a rementa di hopi cu nan lo tabata. Aworaki tin masha hopi trabou ta wordo haci, y simplemente e SCP no por para. E intencion ta pues pa sigui cu esaki otro aña. 

ELECCION 

Pero mes momento e mandatario ta conciente cu e por prolonga esaki solamente te na fin di e gobernacion aki. Ta keda na e proximo gobernacion ( si esaki no tin signatura di MEP), pa dicidi si nan ta continua cu e plan aki. Pero Croes a bisa cu e tin confiansa cu esaki lo sigui, si tuma nota cu ora cu a pasa e leynan di SCP, esakinan a pasa di forma unanime. Pues e tin e conviccion cu esaki lo ta e caso tambe.