Gobierno a pone ambtenaarnan ter beschikking pa Crisis Team

ORANJESTAD – Gobierno a cuminsa usa ambtenaar pa yuda y asisti e COVID-Crisis team. Den un carta cu e portal aki tin den su poder, prome minister den un carta pa tur hefe di departamento di gobierno, ta pidi nan pa pone personal disponibel di nan departamento. “E CRISIS team lo usa e personal disponibel si ta necesario y lo percura pa entrena y of duna instruccion pa e tarea cu e personal (di gobierno) tin cu eherce. ‘E terbeschikkingstelling ta den interes nacional y lo perdura tanten cu e crisis team haya esaki necesario, y lo tene cuenta cu e interes di e departamento’ e carta ta sigui bisa. E cos ta asina urgente cu a pidi pa prome cu awe 2’or, e nombernan di esnan ‘ter beschikking’ ta conoci cerca DRH (Departamento di Recurso Humano).

FALTA DI PERSONAL

Tabata diaranson anochi durante e briefing di COVID19, cu prome minister Wever a informa cu un di e medidanan ‘nobo’ cu ta drenta na vigor a consecuencia di e aumento di casonan positivo di COVID19, ta cu ta aumenta e control na casnan unda cu tin personanan cu COVID19. Pa por haci esaki, mester a aumenta e cantidad di persona. A bisa cu esaki enberdad ta rekeri personal y placa. Y awor ta compronde cu via e carta aki, gobierno kier usa su personal mas miho posibel, sin cu ta bay den extra gasto.