Kock: Famianan ta muriendo 'letterlijk' ahoga na cas pa COVID19

ORANJESTAD – E situacion na hospital ta hopi critico. Asina e specialista di pulmon, dr Selene Kock ta bisa den un video di casi 5 minuut diahuebs. E video ta splica e berdad curu, duro cu hospital ta pasando aden. Si pueblo tur dia ta tende di CRISIS team cu ‘tur cos ta bou di control’ y no tin motibo pa alarma ‘ainda’, hospital ta duna un bista completamente diferente. E ta un contraste duro di e realidad cu COVID19 tin Aruba aden aworaki. Y e specialista ta usa palabra y ehempelnan bibo, pa describi e situacion critico y serio cu ta sosodiendo na Aruba. Rapidamente, e video aki a bay viral na Aruba. 

KICO TA E SITUACION

Kock ta cuminsa na splica cu e situacion ta critico, y cu mientras ta blo bisa cu tin ‘suficiente cama’, tin falta critico di personal. “Nos ta pega cu personal” Kock ta bisa.”No tin suficiente”. E ta splica con tur departamento ta sacando nan enfermeronan cu e meta djis pa asisti y traha pa e situacion di COVID19, cu tur consecuencia. Entre nan cu otro departamentonan ta keda manca, y cu esaki, pashentnan cu mester di otro ayudo agudo. Asina serio e cos ta segun Kock, cu door di e situacion ey, pashentnan a y lo muri, en espera di un operacion no COVID19, manera cancer, pasobra no por a warda. 

SCARSEDAD

Ademas Kock ta splica cu un simple ehempel con crucial e situacion ta. Hunto cu otro specialistanan di pulmon, nan tin tur siman 11 cama di pashent di pulmon pa trata. Awor esaki a subi te na 44 cama. Esaki ta nifica cu tin zero (0) espacio pa e specialistanan haci un diagnostico necesario manera mester ta. 

KEDA CAS 

A urgi algun biaha den e video, pa keda cas, pasobra sino ‘famianan ta letterlijk muriendo ahoga door di COVID na cas. Esaki pavia cu hospital ta yen y no tin lugar pa e personanan aki keda interna. Ta manda nan cas cu oxigeno y antibiotica, pa nan wordo trata na cas, pa haci lugar pa esnan aun mas critico. Pero e grupo aki tambe ta muriendo. Y finalmente, ta pidi pa tur hende keda cas si no tin cu sali sino ta pa trabou of cosnan esencial. “Pa cuater siman haci bo mes un toque de queda” Kock ta finalisa bisando. Cu esaki e ta mustra cu no ta 2 siman manera cu ta bisa cu e situacion lo por drecha, sino den 4 siman.