A tuma medidanan pa COVID19 conforme e origen di contagio

ORANJESTAD – No ta ‘necesario’ pa tuma medida drastico ‘ainda’ manera Shelter in Place y amplia p.e. Toque de Queda, aunke cu e cifranan di casonan positivo di COVID19 ta halto. Asina prome minister Evelyn Wever a bisa diaranson anochi durante e briefing pa COVID19. Manera cu e portal aki a raporta caba, awe Aruba a yega e cantidad record di casonan positivo pa un dia, cu ta 141 caso. Esaey a pone cu hopi a kere cu gobierno lo a anuncia y tuma medidanan drastico atrobe. Sinembargo, e medidanan tuma tabata ‘solamente’ pa amplia control riba casnan cu tin casonan positivo, tanto den frecuencia como cantidad di persona. Y tambe aplica multanan di mil florin bay ariba. Y pa straño cu e por a zona, a bolbe haci peticion riba e comportacion civico di nos ciudadanonan, aunke cu ta netamente esaki a pone cu nos ta unda cu nos ta. 

MOTIVACION

E motivacion pa e tipo accion tuma diaranson, ta bin a base di conseho di expertonan medico, premier Wever a splica. Riba peticion di e portal aki, Wever a amplia e motivacion, bisando cu mirando cu 70% di e contagionan local ta di bishita na cas unda cu famianan ta pega otro. Y basa riba esey, a tuma e medidanan menciona. Un posibilidad di medida manera cera bar, y of aumenta orario di Toque de Queda, no necesariamente ta yuda e causa den e cas aki, si (segun Gobierno) e contagio ta tumando lugar na cas. Pues cera un restaurant of cere mas tempran, lo no logra e meta. Ta si aki dos siman ainda e cifra di contagio ta halto, lo implementa posiblemente un shelter in place atrobe, of amplia e toque de queda of te hasta un lockdown. Pero awor no. Algo cu a sorprende hopi, manera cu comentarionan riba social media tabata expresa. Sigur e parti unda cu a haci un yamada riba comportacion civico. 

ECONOMIA TA HUNGA UN ROL

Tabata bisto, cu for di e palabranan di e prome minister, nan tin e dilemma cu cierto medidanan tuma lo por afecta economia di Aruba y manera cu e mandatario a bisa, den e crisis, ta tur angulo mester wak, pa ta sigur cu ta atacando e parti corecto. E mandatario a subraya e parti economico varios biaha diaranson anochi, indicando cu nan ta ‘entre la espada y la pared’, unda cu mester tene masha cuidou cu medidanan cu por afecta e economia cu ta kibra caba. E mandatario a bisa specificamente cu mientras cu e parti di salud ta importante, mester tene cuenta cu e parti economico tambe. Y por nota cu economia a pisa mas pisa e biaha aki, ora di tuma medida. 

ORIGEN DI CONTAGIOA splica cu 70% di contagio ta na casnan, pero tambe tin 20% cu ta contagia na pia di trabou. Riba pregunta di e portal aki, DVG su representante Sharline Koolman Wever a bisa cu ta trata ki di oficina. Pues na pia di trabou di oficinanan e problema ta. E no ta na e sector hotelero ni construccion of algo por el estilo, sino na oficina. Ta parce cu na oficina, trahadonan no ta respetando e reglanan cu mester tin. Y esey ta pone cu e contagio ta tumando lugar. Notable ta cu no a haci ningun mencion di scolnan cu tabata un di e puntonan cu lo a kere cu tambe lo a actua, den sentido di cu lo a cera scolnan. Esey no a sosode

TAPABOCA

Otro pregunta cu a bin di parti di e portal aki, ta e hecho cu ta mirando hopi hende cu tapaboca, pero cu ta ‘pega’ riba otro. A haci e pregunta cu si tur hende den e grupo, bisti tapaboca, ta ok pa pega riba otro, osea cu ta suficiente cu solamente tin tapaboca. Aki Koolman di DVG a bisa cu esey no ta e caso. E ta un factor di 3 punto, esta bisti tapaboca, tene distancia di 1.5 meter for di otro, y laba man, cu ta logra tenebo ‘mas’ safe di por haya e virus. Pues no solamente bisti e tapaboca, y kere cu e ora bo ta safe y por pega riba otro, sinta mas cerca di otro. Tin hopi potret cu ta circula di casonan manera menciona.