No a yega na consensus ainda (cu Aruba) pero ta papiando

ORANJESTAD – “Nos no a yega na un consensus ainda (cu Aruba), pero nos ta papiando“. Asina secretario di estado Hulandes Raymond Knops a bisa diaranson mainta ora di Aruba, durante e debate cu miembronan di Tweede Kamer riba e fianza pa e sosten di likides pa islanan CAS. “Mi por bisa acerca cu nan ta combersacionan constructivo. Nos no ta di acuerdo semper, pero e ta bayendo riba un forma respetuoso” E  mandatario a referi specificamente riba e combersacionan cu e ta hibando cu premier di Aruba Evelyn Wever Croes. Mientras cu e ta confirma cu nan ta papiando ainda, y cu e por dura algun siman mas (pues no cu e ta keda cla pa diabierna, e la bisa tambe cu esaki no por sigui mas pa largo. Notable tabata cu e miembronan dI Tweede Kamer aunke critico, a bisa tambe cu nan no tin problema cu gobierno Hulandes ta pone condicionan estricto prome cu manda placa den nos direccion. Nan preocupacion mas bien ta cu esnan vulnerabel, cu no tin trabou y cu tin necesidad urgente di haya e paketenan di cuminda. 

CONSENSUS

Knops ta spera cu Aruba participa cu e ley di consensus. “Pasobra esey ta e punto pa e base huridico. Si no tin un consensus, no tin un ley di consensus. Asina simple e cos ta” Knops a sigui bisa. Mes momento e lo a spera cu no ta necesario pa tin un ley di consensus. “Pa nos djis transferi e placa, y pensa cu cos lo bay bon. Mi kier kere tur cos, pero mi ta wak, y mi a wak mucho di esey, y hasta si tin e gana, e ta dificil. Pasobra hopi mester sosode” e mandatario a sigui bisa, indicando cu sin e ley, no tin garantia cu cos lo sosode. Tambe e la bolbe ripiti e asunto di e cambio cu Parlamento di Aruba a haci den e ley di LAFT, pa cual Hulanda definitivamente a keda cu un sabor amargo. Y a bolbe ripiti cu e motibo pa tin e ley di reino ta pasobra no kier pa Parlamento por haci e cambionan despues manera a sosode cu LAFT. “Y pesey tin un Rijkswet y no un landsverordening” Knops a bisa enfaticamente.  

KICO TA PASA SI ARUBA NO ACEPTA

Un di e parlamentarionan (Kuiken) a puntra kico ta pasa si Aruba y e otro islanan no acepta. E ora e opcionan ta cu ta para e negosacion, ta habri un di dos ronda di combersacion of ta wak con e pais (nan) mes ta regla nan asuntonan. “Esey ta enberdad e mas of menos e opcionan cu tin” Knops a sigui bisa aunke e no kier a delanta riba e scenarionan aki. Loke ta molestia Knops ta cu paisnan ta mas enfoca riba e aspecto di autonomia, envez di wak e perspectiva nan dilanti. “Esey pa mi ta importante. Si ami ta un ciudadano, mi lo kier sa unda mi ta para otro aña. E decisionan tuma ta den mi interes of no” Knops a bisa, mandando asina un mensahe pa e parlamentarionan. Y e tema di autonomia a bin dilanti bastante biaha. 

AUTONOMIA

No ta bay pa gobernantenan, no ta bay pa autonomia, no ta bay pa cosnan cu no tey mas, pasobra aworaki no por papia di autonomia”  . E tema di autonomia a keda bin dilanti, y segun Knops, mester wak pasa di esey. “Riba papel, pero no den practica (tin autonomia)” Knops a sigui bisa. “Mi a bisa anteriormente cu e paisnan no por carga nan autonomia y mi ta sigui para 100% tras di e punto ey” e mandatario a sigui bisa. Knops ta bisa mesora tambe cu e kier duna e paisnan e perspectiva, di por carga e autonomia.