Gobierno di Aruba preparando contra propuesta pa Hulanda

ORANJESTAD – Gobierno di Aruba y e ekipo di professional asistiendo gobierno cu negosacion cu Hulanda, ta trahando riba un contra propuesta pa Hulanda. Por lo menos, esaki ta loke prome minister Evelyn Wever Croes a informa diamars anochi riba su pagina di Facebook. “Nos a ricibi documentonan nobo y condicionnan nobo cu ta wordo revisa pa prepara contrapropuesta” Wever a bisa. El a presenta e ekipo tambe y manda su agradicimento pa e team. Hecho ta cu ainda Aruba no ta cla ainda, aunke a bisa cu kier ta cla pa diabierna awor ora cu tin Rijks Minister Raad. E intencion lo tabata pa manda e propuesta pa RMR dicidi e ora riba dje. Aruba no ta riba agenda mirando cu secretario di estado Hulandes Raymond Knops a haya mandato pa negosha pues tanten cu esey ta e caso, e no necesariamente mester ta riba agenda. Si Aruba keda cla prome cu diabierna, e ora eventualmente por pone riba agenda. Y si e keda cla pero laat, por bin un RMR ‘ingeplanned’ cu por tuma lugar e siman siguiente. Punto ta cu tempo ta cabando pa Aruba y e mester di placa sino Aruba ta practicamente bancarota nificando cu e no por cumpli cu su obligacionan financiero. Potret cortesia gobierno di Aruba (Facebook)