Casonan a aumenta awe cu 107 nobo positivo di COVID19 na Aruba

ORANJESTAD  - Despues cu dialuna a habri cu 33 caso positivo di COVID19, esaki ta bula bay te 107 atrobe diamars (aumento di 74), cual tur ta residente segun DVG. Mientrastanto 49 persona mas a recupera,, total di activonan awo ta 1281, total di testnan haci ayera ta 505, caso di fayecimento relaciona Covid-19 ta 15. Hospital ta informa cu tin un total di 40 persona interna di cual 11 ta den cuido intensivo y 29 ta isola riba piso general. Segun DVG Hospital tin e posibilidad pa aumenta su capacidad di cuido intensivo te na 21 unidad y riba piso general por duna cuido na 60 persona Covid-19 positivo. Esaki ta interesante pasobra recientemente ainda a bisa cu por aumenta ICU te na 33 unidad. 

HOSPITAL 

DVG ta sigura cu te na e momento aki Hospital tin capacidad suficiente pa duna e cuido nesesario na es cu tin mester di dje, pero no mester descarta cu mas hende por wordo interna. P'esey ta importante pa comunidad haci lo maximo posibel pa proteha nan mes na tur momento. Sigui e consehonan duna y na prome indicacion di cualkier sintoma tuma contacto cu dokter di cas pa por haci un test. Ta imposibel pa observa kende tin e virus den un fase unda ainda no tin sintoma, p'esey ta importante pa nos proteha nos mes na tur momento y contra tur persona.