Knops: Condicionan di Hulanda ta inusual pero no ta atacha autonomia

DEN HAAG – ‘Mientras cu e pasonan (condicionan cu Hulanda a pone pa e islanan di Caribe Hulandes haya mas placa fia ta inusual ), esey no kier men cu e proposicion ta viola ‘frontera constitucional’. Asina secretario di estado Hulandes Raymond Knops ta contesta Tweede Kamer den un carta di 8 pagina diamars mainta riba condicionan di e di tres fiansa unda cu e la referi na solucionan inortodox (no usual) pa e situacion. Aruba kier yega na un areglo mas tarda diabierna awor durante e siguiente Rijks Minister Raad. Pero te cu dialuna, ainda Aruba no a keda cla cu un 'acuerdo' cu Aruba por biba cu ne. E carta awe di Knops, por impacta e situacion unda cu cierto declaracionan por tin su impacto riba e resultado di e 'acuerdo'. E RMR ta diabierna awor na Hulanda. 

ATACHA AUTONOMIA

Knops a haci hopi esfuerso pa sigura Tweede Kamer cu ningun momento Hulanda ta violando constitucion, y tampoco ta ‘atacha’ autonomia di e islanan, sino mas bien ta ‘limita esaki temporalmente’, esta pa duracion di e ley di reino cu ta valido pa e entidad nobo. Segun Knops, tin un diferencia substancial entre ‘limita’ y ‘viola’

STATUUT

Segun Knops, Statuut di Reino ta laga hopi espacio pa e paisnan   pa atende cu situacionancrea den tanto un aspecto procedural y uno material sin cu ta mina cu autoridad formal cu ta resorta na e organonan di e respectivo paisnan. “Esaki ta conta tambe pa e ‘budgetrecht di Parlamento” Knops ta sigui bisa den e carta. “Esey ta keda intacto, despues di cu e ley di reino drenta na vigor, mescos cu otro derechonan Parlamentario riba e terno di gobernacion y regulacion”.

KICO TA PASA SI PARLAMENTO NO APROBA REFORMA

Si Parlamento di un pais, pa cualkier razon, no ta dispuesto pa aproba un cierto reforma of e financiamento di esaki di nan propio presupuesto, nan por para esaki, segun Knops. Pero e consecuencia lo ta si cu e entidad of gabinete Hulandes lo stop completamente cu e dunamento di ayudo financiero. “Esey lo no ta un restriccion di e democracia Caribense, sino mas bien relaciona cu e presencia di un sistema democratico di e parti Hulandes” Knops ta sigui splica.

VIOLACION DI AUTONOMIA

Ademas segun gobierno Hulandes, e instalacion di e Entidad di Reforma Caribense (CHE) no ta un violacion di e autonomia di Aruba, Corsou y St Maarten. “Autonomia ta un concepto cu un significacion amplio. E ta contene entre otro e principio di democracia” e mandatario a bisa. “Pero e ta encera tambe cu paisnan mes mester atende cu nan propio asuntonan. E paisnan actualmente no por carga nan economia” Knops ta ripiti atrobe den e carta aki. Y den cuadro di esaki, Hulanda kier ‘cay aden’, pa ‘yuda’ pa e islanan por carga nan propio economia atrobe. Aki Knops ta admiti cu temporalmente, lo mete cu e autonomia, te ora cu e islanan mes por sigui. “Un limitacion di autonomia di un pais den Reino (Hulandes) mester ta proporcional pa cu e obhetivo cu e ta persigi. Y aki ta unda gobierno Hulandes ta bisa cu e islanan no por sali di e crisis aki sin un inspiracion mutuo multi annual cu ta bon hinca den otro y unda cu ‘Hulanda ta participa activamente’. Aki pues Knops ta mustra unda cu lo, pa un periodo limita, mishi cu autonomia di e islanan. Lesa e carta completo AKI