Hospital mester a aumenta espacio pa pashentnan di COVID19 debi cu lugar a yena

ORANJESTAD – E situacion na hospital pa loke ta COVID19 a ‘empeora’ diamars ora cu e cantidad di pashent interna pa e malesa aki a yega 40. Cifranan cu Hospital mes a suministra diamars pa prensa, ta indica cu e cantidad di persona interna den ICU a aumenta te 11 (e tabata 9), y esey ta cu tin 1 persona a sali di ICU. Pero mes momento 3 pashent nobo a drenta ICU. Vocero di hospital Charlaine Huntington a confirma diamars mainta pa e portal aki cu enberdad hospital mester a aumenta e capacidad di cama disponibel ya cu e prome 30 camanan a yena. Segun e informacion diario, hospital a informa tambe cu atrobe un grupo di 9 pashent nobo a keda interna riba pisomientras cu 5 a bandona hospital. Na tur e cantidad a bira 40 pashent total interna. Di otro banda, a compronde cu algun a wordo manda cas, pero no cu nan ta bon, sino a manda nan cas cu ekipo di hala rosea. E ultimo parti aki, e vocero no por a confirma.  

MAS ESPACIO

Pa loke ta e informacion concreto cu e portal aki tin ta mustra cu e seccion cu tabatin reserva pa pashentnan di COVID19 esta piso 3, mester a wordo amplia, di 30 cama pa 60. Pues esaki por nifica cu lo a añadi un piso acerca pa e pashentnan di COVID. E problema ta cu door di aumenta e capacidad pa pashentnan di COVID, esaki a pone cu e espacio pa pashent no COVID a bira menos. Ta netamente loke cu tabatin miedo cu lo a sosode, pa cual a impone e Toque de Queda un biaha mas.