Gobernador: Uni forsa, pone diferencia un banda y pone nos mira riba recuperacion di nos isla

ORANJESTAD – Mester uni forsa, pone diferencianan un banda y pone nos mira riba recuperacion di nos isla. Esaki tabata un di e puntonan cu Gobernador di Aruba, su excelencia Alfonso Boekhoudt a repasa diamars mainta durante su discurso. Manera por a spera, e discurso di e gobernador na occasion di apertura di aña Parlamentario nobo diamars mainta , a enfoca tambe grandemente riba e tema di e crisis mundial y na Aruba ocasiona pa COVID19. Ademas, manera ya indica, el a toca e aspecto di e negosacion cu Hulanda, eleccion y tambe un tema hopi actual, esta avansenan den enseñansa cu por spera den e proximo aña. Debi na e impacto di COVID19, contrario na e forma normal di e apertura di aña Parlamentario, no tabatin invitadonan,  prensa ni publico den e sala. Tambe tabata notable cu Gobernador y su señora y mayoria di Parlamentario, tabatin nan tapaboca bisti. Un muestra atrobe di e 'normal nobo', sea temporal of di futuro. 

COVID

Segun Gobernador, democracia a manifesta su mes di e forma mas puro. “Nunca antes e libertad di move of di hiba un bida normal di nos generacion, a wordo limita manera cu a sosode for di maart di e aña aki, pa yuda combati e contagio di coronavirus” Gobernador a cuminsa na bisa. Y a sigui elabora riba e consecuencia y efecto di e virus. 

RELACION CU HULANDA

E relacion cu Hulanda basa riba e negosacionan pa haya fondo pa maneha e crisis tambe tabata parti di e discurso. Y cu esaki, a duna un indicacion cu e loke keda dicidi, lo afecta e maneho di gobierno grandemente.“ E Aña Parlamentario cu ta inicia awe lo wordo caracterisa pa un relacion nobo y diferente cu Hulanda, sea cu nos bisa ‘si ’of bisa ‘no ’na e leynan di Reino cu tin ariba mesa. E relacion nobo aki lo influencia grandemente e maneho di Gobierno den futuro” Gobernador a sigui bisa.

ELECCION

Otro aña September, Aruba ta bay urna electoral pa participa na e Eleccion Parlamentario 2021. Y aki tambe Gobernador a toca e tema.  “ E Aña Parlamentario aki tambe lo ta den lus di e contienda electoral, unda cu esnan cu lo participa lo tin retonan sin precedente pa atende cu nan. Parlamento tin un ley di iniciativa pa cambio di ley di financiamento di partidonan politico, como tambe e ley nobo cu ta regla screening di ministernan. Esakinan ta leynan importante cu lo mester wordo trata pronto, manera tambe institucion di e ombudsman – e defensor di pueblo – como ultimo Pais den Reino pa regla esaki.”

DIFERENCIA DI OPINION

Loke a experencia tambe ta e division cu tin na Aruba entre varios grupo, partido politico y ciudadanonan. Esaki basa riba tur loke ta sosodiendo y cu tur hende tin un of otro opinion. Aki Gobernador a pidi ayudo di comunidad pa tin mas union. “ Mester uni forsa, pone diferencianan un banda y pone nos mira riba recuperacion di nos isla. Den e ultimo dianan aki a nota demasiado division, proteccion di podernan politico, falta di disponibilidad pa un dialogo genuino, unda participantenan ta kibra cabes hunto pa forma un solo frente pa Aruba por recupera di e crisis aki. Nos no por keda pega den erornan di pasado y purba desacredita otro, y spera cu esey lo alivia nos situashon. E crisis aki a pone un spiel nos dilanti, y e tempo a yega pa reenforsa e pilarnan di nos sociedad”.

ENSEÑANSA

Loke a hala atencion tambe ta e enfoke riba e.o. enseñansa cu a keda grandemente afecta pa COVID19. Basa riba esaki a splica e plannan di gobierno pa e futuro di enseñansa na Aruba. “ Gobierno lo sigui enfoca riba e trayecto di e-learning y traha hunto cu nos scolnan, pa percura pa nos muchanan desaroya habilidadnan di siglo 21 y transforma den adulto sano y capas di abarca e retonan cu lo presenta. Pa e an?a escolar nobo, a haci’e posibel pa cuminsa cu scol virtual na Ingles, mientras tambe lo stimula nos hobennan pa studia educacion superior online, tanto via universidadnan di Hulanda como di Merca. Den otro esfuerso, gobierno ta bay inicia e prome scol publico bilingual; y pa e aña nos dilanti Aruba lo conta cu cuatro scol HAVO subsidia pa gobierno”. Screenshots ta cortesia di Telearuba. Pa e discurso completo di Gobernador Alfonso Boekhoudt, click AKI.