Pasaheronan di buelo humanitario a keda someti na control di COVID19 ora a yega Venezuela

LAS PIEDRAS – Dialuna atardi, manera cu noticiacla a raporta caba, e buelo humanitario pa Venezuela for di Aruba a tuma lugar porfin. Finalmente ta 78 pasahero (di 100 cu tabata poni pa biaha), a yega Las Piedras, estado Falcon unda cu nan a keda ricibi pa e.o. Gobernador Victor Clark, y e secretario di salud. Despues di a keda someti pa un control completo medico, a transporta tur pasahero pa nan respectivo residencia, sea fiho of temporal. Manera por mira di e potretnan exclusivo obtene pa e portal aki, unavez cu e avion a yega, a haci un limpiesa total di tanto e avion como ekipahe, y a controla e pasaheronan un pa un. Manera ta conoci hopi di nan, pa no bisa mayoria, tabata personanan cu a keda deporta, debi cu nan estado tabata ilegal riba e isla. Pero debi na e crisis di COVID19, no tabatin buelo pa Venezuela pa cual hopi a keda deteni den e centro di detencion na Guarda Nos Costa. Finalmente cu intento di embahada Hulandes y esfuersonan di gobierno Venezolano, a logra saca un buelo dialuna. A compronde cu tin mas persona cu tin y kier biaha, pero no ta conoci si lo tin mas buelo por lo pronto.