Hopi Venezolano sin status legal a keda deporta awe cu buelo humanitario

ORANJESTAD – Un total di 100 pasahero Venezolano a bandona Aruba dialuna merdia riba un buelo humanitario, despues cu esaki a keda cancela diahuebs den su prome intento. Segun ministerio di husticia, entre e pasaheronan ta conta varios Venezolano sin status legal cu a keda deporta, mientars cu tabatin tambe un grupo cu voluntariamente a inscribi nan mes pa nan regresa nan pais y a paga e pasashi nan mes. E grupo mas grandi, ta esnan cu mester a wordo deporta, cu a wordo transporta for di e centro di detencion di Warda Nos Costa. 

CANCELACION

Manera cu e portal aki a presenta den forma di primicia, e buelo humanitario pa Venezuela cu mester a tuma lugar  diahuebs no a sigui mas.  Segun minister di husticia Andin Bikker na e portal aki diaranson siman pasa, tabatin tres instancia ta trahando duro pa algun siman caba pa logra saca e buelo aki di 92 pasahero di cual 25 a paga nan propio pasashi. Hopi di e personanan aki ta forma parti di e grupo di persona cu ta ilegal, y na Warda Nos Costa y cu ta pega riba e isla debi na e problema di COVID19. Tambe e portal aki a compronde cu for di banda di autoridad y gobierno Venezolano, nan a haci tur lo posibel y coopera pa e buelo aki por tuma lugar. E informacion cu e portal aki tin ta cu e aeroliña en cuestion (Laser) a pone pia abou cu e kier wak placa prome cu e buelo sali. Pero e portal aki a compronde cu placa no ta e problema ya cu Hulanda ta yuda financia esaki. Ta mas bien e parti di con y na unda ta paga esaki, debi cu ta trata di un pago na un compania Venezolano. Atrobe, minister Andin Bikker a informa e portal aki cu tanto Directie Buitenlandse Betrekkingen, Directie Luchtvaart y DIMAS tabata ‘bezig’ cu e trabounan aki. E intencion tabata pa e buelo sali diahuebs pa Venezuela, pero debi na motibonan logistico, esaki a sali apenas dialuna, esta awe. Potretnan cortesia ministerio di husticia. 

COVID TEST

Loke ta hacie mas fastioso ainda, ta e hecho cu tur esnan cu ta poni pa biaha, mester y a haci nan test di COVID19 manera cu gobierno di Venezuela ta rekeri. Si e buelo no sigui, e testnan aki ta core risico di caduca, pa cual mester haci esaki atrobe, cu tur e gastonan cu esaki ta bin mara cu ne. A compronde cu ta costa por lo menos 15 mil dollar pa saca un buelo asina.