Encuesta ta sugeri un cambio di politica radical na Aruba

ORANJESTAD – E resultado di e ultimo encuesta di noticiacla entre su usuarionan den fin di siman, ta sugeri un cambio basta radical politico cu mester bin pa Aruba. E fin di siman aki e portal aki a publica otro encuesta cu varios pregunta riba e tema di Eleccion Parlamentario 2021. E encuesta entre e usuarionan di noticiacla a conta cu un participacion di riba 2600 persona (E cantidad di usuario di noticiacla riba Facebook ta algo riba 25.000). 

PREGUNTANAN

E preguntanan tabata inclui entre otro cu si e persona a vota den eleccion anterior (2017), y tambe si nan lo vota mescos den e proximo eleccion. Ademas tabatin esun popular di pa cua partido nan lo vota. Aki ta unda cu e sorpresa a bin (pa hopi). Un otro nota interesante ta cu e grupo di edad mas grandi tabata e hobenan entre 18-24 aña). E resultado tambe ta refleha esaki. Y finalmente, un pregunta por ta poco ‘apart’, pero interesante tabata riba e structura estatal di Aruba. Esta si kier mantene e Status aparte actual, of kier cambia pa Provincia di Hulanda of independencia di Hulanda. Aki tambe tabatin sorpresa. 

VOTAMENTO

E prome sorpresa tabata e edad di votamento. Normalmente e usuarionan di e portal cu ta participa ta riba 35 aña, y depende e tema edad mas halto. E biaha aki, e grupo di edad cu a prevalece tabata di entre 18-24 aña unda cu 639 (24.42%) a participa. Despues a sigui e pregunta di votamento, unda cu 2419 (54.10%) a bisa cu nan a participa na e eleccion anterior (2017) y 204 (7.78%) a bisa cu nan no a participa na e ultimo eleccion. Y ora cu a puntra si entre esnan cu a vota, nan lo vota mescos e biaha aki, esta pa e mesun partido politico, e mayoria cu ta 1627 (63.14%) a bisa cu si, pero un grupo toch relativamente grandi di casi 1000, (950 cu ta 36.86%) a bisa cu nan lo no vota mescos mas. 

PARTIDONAN POLITICO

Pa loke ta e pregunta mas popular, esta cua partido bo lo vota ariba, esun cu a resalta tabata e partido na mando, esta partido MEP cu 698 ‘voto’, cu ta 26.83%, y e districto cu mas MEP a score tabata Santa Cruz (43%) y e grupo cu mas a vota pe ta e grupo di 65 aña bay ariba. Mester menciona cu MEP tabata e partido cu tabatin e miho cifranan den practicamente tur districto. Pero djey ta bin (pa hopi) e sorpresa unda cu e partido politico mas nobo, consistiendo di hoben (HTC) a logra sali na di dos lugar cu 587 voto (22.56%) sigui pa AVP na di tres lugar cu 354 voto (13.60%). Pa loke ta HTC, e districto cu mas tabatin voto di e grupo aki, tabata Oranjestad (53%) y cu mayor cantidad di voto (88%). AVP a score halto de bario di San Nicolas (26%) y Savaneta (22%) y den e categoria di edad 55- 64. Y e siguiente tambe pa hopi tabata sorpresa, unda cu e opcion di un ‘otro partido politico nobo’ cu por aparece ainda, tabata opcion number 4. Aki e grupo di edad 35-44 y 45-55 a score miho cu 20 y 21% respectivamente. E districto unda cu mas nan tabata activo, tabata Noord y Santa Cruz, 19 y 17% respectivamente. E opcion aki a haya 327 voto (12.57%). Pues e ta sugeri cu por lo menos, entre esnan cu a participa, kier wak un cambio radical den politica di Aruba. E partido cu tambe bal mencion ta RAIZ cu a score basta halto banda di e opcion di partido NOBO. E la sali na di 5 lugar, y tabata mas popular den Noord y Savaneta cu 19 y 17 % respectivamente, y tabata mas popular entre e edad 25-34 y 35-44 aña cu 21 y 22% respectivamente. Pa loke ta e otro partidonan actual den gobernacion, RED y POR, nan a caba na di 7 y 8 lugar respectivamente, cu 99 (3.80%) y 33 (1.27%) voto respectivamente. Den e encuesta aki, nan no a presta mucho bon, pero atrobe, ta un encuesta entre usuarionan cu a participa via noticiacla. E partidonan UPP y CURPA respectivamente ta finalisa e top 10 di partido cu 23 (0.88%) y 14 (0.54%) voto respectivamente. 

STRUCTURA ESTATAL DI ARUBA

Un pregunta cu tambe a haya hopi acogida, aunke por considera e pregunta aki ‘for di lugar’ mirando cu durante e eleccion proximo esaki no ta un opcion pa scohe. Esey no a kita afo cu e resultado ta laga hopi hende pensa cu esaki por afecta e proximo eleccion toch. E mayoria cu a contesta e pregunta aki, esta 1367 (52.02%) a scohe pa mantene Status Aparte di Aruba. Ta trata di e grupo di 55-64 y 65 y mas halto, cu a vota 71 y 76% respectivamente. E grupo cu menos a vota pa Status aparte tabata e grupo di edad hoben 18-24 cu tabata 9%. Pero mas di mil persona (1192 ) a opta pa Aruba bira un provincia di Aruba. Esaki tabata bon pa 45.36% di esnan cu a participa den e pregunta aki. Aki e mayoria di esnan cu a vota, tabata hobenan den categoria 18-24 aña, y e siguiente 25-34 aña cu 90 y 33% respectivamente. E grupo cu menos a vota pa esaki tabata esnan den edad di 65 bay ariba.  E ta sigur algo pa tene cuenta cu ne. Y finalmente e grupo mas chikito, 69 persona a vota pa independencia di Aruba cu ta 2.63%. Aki e gruponan di edad cu mas a vota pa independencia tabata esun di 25-44 y 45-55, ambos cu 4%.