Minister ta expresa su mes riba actuacion di otro minister riba Facebook

ORANJESTAD – Mientras cu e no ta haci mencion den su post di su colega Marisol Lopez Tromp, minister Xiomara Maduro a dedica un mensahe den su direccion diadomingo anochi. E mensahe ta relaciona cu e presentacion recien di Lopez Tromp den Parlamento unda cu el a toca e tema di corupcion y sugerencia cu tin politiconan corupto na Aruba. E mandatario di Finanza a sinti su mes yama pa reacciona riba e tema aki den su post. 

E POST

E post ta bisa textualmente lo siguiente: “Den e dianan aki a crea e impresion cu tur politico of Ministernan di Gabinete Wever-Croes ta corupto. A wordo sugeri pa no solamente haci screening promer cu bira Minister, sino tambe tur aña. E ultimo aki, na mi opinion, no mester ta un problema. Dimi parti, lo por screen tur luna mes sin problema. Ademas si tin motibo pa esaki, Minister President por laga screen un Minister anytime cu e ta haya cu esaki mester pasa. Pa locual ta e screening cu a tuma lugar di tur Minister cu ta forma parti di Gabinete Wever-Croes, ta bon pa splica cu TUR Minister a pasa den e MESUN screening. Pues no tabata tin un Minister cu a pasa un screening mas rigoroso cu otro. Claro e ta depende na e actividadnan di cada Minister, con profundo e screening ta bay. Si bo no tin mucho cos riba bo 'kerfstok,' e screening no tin motibo pa ta rigoroso. E ta lamentabel cu ta crea e impresion cu tur politico ta corupto, pasobra esaki no ta berdad. Tin politico cu ta asumi nan responsabilidad pa haci nan trabou na serio y no ta perde tempo ta haci wega, sigur no memei di un pandemia cu ta trece cune un crisis di salubridad y di likidez. Mi ta haya hopi lamentabel cu ta desvia atencion di full un Pueblo riba spirito cu no ta existi, siendo cu tin issues grandi cu si ta touch tur hende bibo riba e Pais aki. Den e crisis aki mas cu nunca, nos tur tin cu asumi nos responsabilidad y no sinta perde tempo valioso na weganan politico cu no ta yuda nos Pais progresa. Aruba tin retonan mas grandi pa atende cune. #MinFEC”. Segun e mandatario, tipo di declaracionan di un minister manera cu Lopez a haci, ta atacha e bon nomber den exterior y como minister cierto cosnan asina no por wordo djis menciona sin mas. 

EFECTO

No ta conoci ki efecto e declaracion (e FB Post) aki lo por tin pa cu e relacion den gobierno. E relacion recientemente a wordo ‘drecha’ segun minister presidente Evelyn Wever Croes, despues di algun siman di impasse. Tabata diabierna apenas cu Lopez Tromp a bolbe acudi na reunion di conseho di minister tambe. Tempo lo bisa ki efecto e post aki lo por tin.