Opinion: Caida y decadencia

Opinion: Caida y decadencia

Posted on 09/7/2020 9:13 am AST | Updated on 09/7/2020 9:14 am AST

Skibi pa Miguel Mansur Jr. 

Na un di e momento nan mas critico pa nos pais, nos gobernante nan ta sigui pone nan interes prome cu interes di pueblo. Tur gremio a articula claramente e colapso economico cu ta biniendo si gobierno no firma. Apesar di mas cu suficiente aclarashon di tur esnan concerni gobierno ta sigui "negocia" cu Hulanda mientras nos tabata tin mester di e placa ayera. 

Posiblemente tin argumento legal contra e condicion nan cu Hulanda kier atacha na ayudo financiero manera algun parlamentario di coalicion kier illustra. Tambe tin argumento legal cu Hulanda mester a impone condicion 20 aña pasa y preveni nos gobernante nan di hiba nos finanzas na un kiebra di cual no tin salida. No ta porta di ki banda di argumento bo ta para, articulo nan opaquo di statuut no tin solucion pa e problema nan cu nos tin awe, awor aki. 

Pone pueblo warda pa e fondo nan asina necesita paso Prome Ministro no por uni su partido pa haci lo corecto ta immoral. Na momento cu fondo pa instancia nan caricativo cu ta parti cuminda ta cabando mientras necesidad ta subiendo poltica ta sigui tuma prioridad arriba bienestar comun. Famia nan ta bai pasa mas dolor, incertidumbre y te hasta hamber mientras e dos partido nan grandi sinta yora e perdida di autonomia cu nan a mes a ocasiona durante 20 aña di mal maneho. Responsibilidad pa esei si nan no kier tuma, pero si nan kier bringa pa nan poder pa sigui derocha.

Lo bo a spera cu oposicion si lo a lanta na defensa di interes general pero nan tambe ta pega den e mesun circo. Realizando cu e condicion nan di Hulanda, cual un encuesta a mustra un 70% di Arubano ta na fabor, lo caba cu e repartimento di beneficio fe saco di pueblo. E mesun sistema politico cu a causa nos problema nan lo keda suspendi pa un periodo di por lo menos 7 aña. Ta keda pa mira si e partido grandi nan lo por adapta na un realidad nobo sin e corupcion, nepotismo, abuso di poder, falta di transparencia y falta di integridad den cual nan a bin ta florece.

Lugar di un gobierno percurando pa e interes di tur Arubano, nos tin un show di con pa tapa buraco y desvia atencion. Lugar di un oposicion relevante nos tin un tragicomedia cu ta kere cu henter pueblo ta sufri di amnesia hunto cu nan. Y mientras e desastre economico ta sigui crece afectando tur sector di nos sociedad, e putri cu tin den nos politica ta sigui plama. 

Awor aki un gobierno competente mester ta preparando stress tests arriba nos sistema bancario pa wak ki caida den turismo nos por absorbe sin pone e sistema financiero na peliger. Manera a keda illustra, ta poco negoshi por opera di un forma rentable bao di e circumstancia nan actual. Mas preocupante ta cu no ta premira un subida na un nivel di break-even pa hopi luna mas kizas ni te hasta e aña aki. 

Esaki ta e momento pa cuminsa desaroya un plan proactivo pa salvaguardia negoshi nan local y e trabao nan cu nan ta genera. Haci nada significa wak banco poco poco cuminsa coi un parti grandi di nos economia den beslag te ora nan mes bira insolvente. Mester ta studiando e posibilidad di un "bad bank" manera diferente pais Europeo a usa den e crisis di 2008 pa absorbe non-performing loans. Como alternativa por considera forma un sovereign wealth fund cu atravez di garantia por bai absorbe negoshi nan local cu lo cera a causa di e crisis. Ni sector publico ni nos sistema bancario tin e experticio pa maneha nan dus lo por inclui e doño nan den esei p.e. atravez di 15% profit share te ora nan por tuma e negoshi nan back. E crisis aki sin precedente ta bai rekeri solucion nan innovativo pa ameliora e daño cu ta bin. 

Haci nada, cu ta parce di ta e plan actual, ta bai resulta den kiebra masal cu ta bai pone e sistema bancario na riesgo y sin un plan e caminda pa recuperacion ta bai ta mas largo y mas doloroso. Politica tradicional ta parce di no tin nada constructivo mas pa ofrece. Na eleccion 2021 si nada no cambia, nada lo cambia tampoco.  

 

 

  • Powered by SETAR