Crisisteam: E pakico ta ‘destrui’ piscanan envez di reparti nan den comunidad

ORANJESTAD – Relaciona cu e criticanan cu a sali den medionan di comunicacion contra di Kustwacht, Comision di Crisis COVID -19 di Gobierno riba e casi 700 kilo di pisca cu a wordo confisca y despues destrui diasabra, diasabra anochi a emiti un  declaracion. E critica cu a bin den dia tabata hopi, unda cu riba rednan social ta critica cu e.o. mientras cu pueblo tin hamber, ta dicidi di destrui pisca envez di reparti esaki pa esnan cu ta den necesidad. Specialmente den tempo aki di crisis. E critica pues tabata asina hopi den comunidad, cu a dicidi di bin dilanti pa bin cu un splicacion. 

E SPLICACION 

Segun e splicacion di e crisis team, desde inicio di e crisis di Covid -19, e Comision y Ministerio Publico a informa den conferencianan di prensa cu a tuma medidanan estricto pa controla y reduci riesgo na frontera cu Covid-19 por drenta Aruba y afecta salud di nos comunidad. Entre e diferente medidanan cu a ser tuma ta e articulo 6.1 di e Ministeriele Regeling cu ta encera cu fronteranan a ser cera y controlnan a ser estableci pa evita cu hendenan di afor por tin contacto cu hendenan local sin cu tin testnan ta ser haci promer y cu ta prohibi pa riba lamar por crusa frontera y intercambia di mercancia, sea ta pisca of cualkier otro tipo di mercancia.

VIOLANDO LEY

Siman pasa y e siman aki Kustwacht a constata cu asina mes, ignorando advertencia y violando ley tin hendenan cu a cruza frontera riba lamar y topa cu hende di otro pais y intercambia mercancia, den e  casonan aki tawata pisca. Na momento cu casonan asina wordo detecta Kustwacht ta actua, e comunicado ta sigui bisa.   Aruba mescos cu otro paisnan rond mundo ta den un estado di crisis pa cu e pandemia mundial di Covid-19 y autoridadnan tin cu actua pa proteha nan comunidad. E mercancia cu ser confisca no por wordo reparti tampoco pasobra cu no sa ki riesgo e ta representa pa comunidad su salud. 

Y crisis team un biaha mas a haci un apelacion ta ser haci pa evita di participa den e actonan contra ley aki ya cu autoridadnan lo actua pa proteha comunidad di Aruba. Screenshot ta cortesia di 24ora.com