Proyecto Resona pa documenta nos musica folklore

ORANJESTAD – E proyecto cultura Resona a keda presenta diahuebs na publico. E proyecto Resona lo percurapa documenta nos musica folklore pa futuro generacionnan Diahuebs merdia Minister di Cultura Otmar Oduber hunto cu Departamento di Cultura (DCA), Sra. Vicky Arens, Michael Lampe y artistanan local a presenta e proyecto cultural folklorico. E proyecto ‘Resona' ta un cu tin hopi necesidad di dje pa por mantene e importancia di e aspecto cultural, folklorico, musical di Aruba  cu lo wordo escohi den e prome fase di e proyecto aki.

Mirando cu hopi di nos cultura no ta wordo documenta na Aruba y ora ta trata di elementonan historico cultural cu ta herencia di un pais, ta hopi importante pa esakinan wordo documenta un caminda pa asina aki por comparti esakinan cu e siguiente generacionnan pa por mantene nan na bida y naturalmente expande esakinan. ‘Resona’ lo scohe 13 cancion tipico di Aruba cu lo wordo treci bek den un bachi nobo, di nos artistanan local hoben. Lo documenta esakinan pa di e forma aki tin esakinan pa educa e hobennan pa laga nan participa cu henter e proceso aki.

DCA lo prepara proyectonan na scol unda lo presenta  ‘Resona’ na e studiantenan. Tambe lo tin presentacion pa tanto hoben y hende grandi pa asina comunidad completo por experenci’e. Mirando e cantidad di artistanan local cu lo ta envolvi den e proyecto, a dicidi pa pone Cas di Cultura disponibel pa asina e hobennan por yega eynan y no solamente mira kico ta wordo haci pero tambe educa nan riba dje. ‘Ta trata aki di un proyecto cu produccionnan hopi importante y di un balor asina grandi cu kier pa e generacion hoben por aprecia esaki cu ta algo di nos mes y transmiti esaki pa futuro generacionnan cu ta bin,’ e mandatario a bisa.