Tur dia ta hospitalisa minimal 3 hende pa COVID19 na Aruba

ORANJESTAD – E cifranan di hospitalisacion pa COVID19 ta sigui fluctua, y diabierna e total di persona hospitalisa na Arubaa baha cu 3 na 27, compara cu e cantidad di 30 e dia prome. E cantidad di pasent den ICU ta sigui na 8, (1 a sali y 1 a drenta), y riba piso esaki ta 19 (2 a drenta y 5 a sali).  Remarcable ta pues cu mientras cu e cifranan average ta keda casi mescos, hende ta drenta y ta sali, pues tin un ‘trafico’ constant di hende nobo cu ta sigui drenta mientras cu otronan ta sali. Manera a indica tin por lo menos 3 persona tur dia cu ta keda hospitalisa pa COVID19. Expertonan medico ta bisa cu e cifra aki lo sigui subi, mescos cu ta e caso pa e cantidad di mortonan. E crisis team di otro banda ta bisa cu e situacion ta bou di control y cu e ta manehable. De hecho ta bisa cu a spera mas hospitalisacion y mas morto, pero cu e cantidad ta hopi abou, pa e cantidad di activo cu tin aworaki.