• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Opinion: Señor Presidente

“Señor presidente…”

Skibi pa Armand Hessels 

Diaranson ultimo 2 di september, mi a sigui e ehempel di casi 10.000 Rubiano, cu no kier a perde e revelashonnan historico ‘live’ di un ministro tocante algun (ex-)colega ni pa nada. Pa mi tawata di prome biaha cu mi a atende un reunion publico ‘bibo’, anke sea ‘on-line’. Mi a keda impreshona profundamente. Ki fracaso y desilushon! Si esaki, tumanda na cuenta e tema, mester representa un di e reunionnan mas importante den historia di Aruba, anto e ora ey mi no por ni imagina mi mes con lo ta den caso cu ta trata di tema menos yamativo.

Divershon popular

Tawata parce cu tur orador kier a scucha nan mes dilanti di un publico asina grandi y pesey a keda ripiti pregunta y ponencia cu orador prome cu nan ya caba e trece dilante extensamente. Den esey nan a logra di crea mas confushon cu claridad. Claro, cu algun excepshon. Pesey mi a yega na e conclushon cu mester a keda palabra internamente pa keda alarga e suspenshon cerca e publico na cas te un maximo. A pesar cu mi mes tawata testigo, mi no por acepta como normal, corda como posibel, cu ‘representante di pueblo’ adulto y bon paga, na un manera satanico y den combinashon cu suspenshon largisimo, a keda postpone eternamente e show principal. Asina el a faya asta como divershon popular!

“Señor Presidente”

Tawata obvio cu e parlamentarionan no tawatin mucho cos importante di bisa. Esey a sali na cla cu e uzo ripiti, hopi iritante y te cu fada, di “Señor Presidente”. Hopi a uz’e na comienso Y (!) fin di cada frase, mientras algun orador riba dje varios biaha mas den cada frase mes. Aparentemente pa yena e tempo di ‘orashon’ cuantitativamente, pa falta di miho. Hopi canson y sin ningun sentido. Un biaha so “Señor Presidente” na comienso di un discurso ta suficiente. A menos cu mester yama atenshon di e presidente pa motibo cu el a pega soño, locual den e circumstancianan actual no lo ta nada straño. Y pio di tur cos ta cu nos ta paga masha hopi placa p’esaki! Pero pa e recipientenan esaki ta ‘easy money’!

Perdemento di tempo

E presentashon aki a fortifica mi convicshon cu Parlamento como tal den nos democracia, basa riba partido politico, ta placa tira afo. Ta enfoca riba show, riba profilashon y ganamento di punto cerca ‘publico’, posiblemente den e speransa pa asina alarga e estadia den Parlamento. Esaki por funcshona cerca espectador cu di berdad no tin nada otro di haci y cu ya caba a perde realidad di bida for di bista. Pero pa cualke otro cu ta para cu tur dos pia den bida y cu su tempo ta valioso, esaki tawata nada mas cu un ‘waste-of-time’ total. En realidad nos parlamentarionan mes lo ta experencia esaki tambe, tumando na cuenta e percentahe di asistencia hopi abou den e reunionnan di comishon.

Educativo

Anke lo anterior lo por duna un impreshon un tiki negativo, locual di ningun manera ta mi intenshon, pa mi e evento aki tawata hopi educativo. Si di berdad esaki mester representa nos organo legislativo y di control mas halto, e ora ey mi ta compronde por fin ta con por ta cu asina hopi caso den pasado a bay robes y te dia di awe no a haya solushon. Caso manera e Ley di Financiamento di partido politico, Ombudsman, control real di gobierno pa medio di cuenta anual, aproba pa accountant cu ta warda algun decada caba riba tratamento. Pues ta duna e impreshon fuerte cu di ningun manera Parlamento ta enfoca riba resultado. Mas bien ta fiha riba mustra mas sabi cu e oponente (locual no ta mucho dificil) y pa tir’e un par’a. Esey t’e cos! Y naturalmente como consecuencia polarisashon den comunidad, cu ta para garantia di fanatismo di clan/partido.

‘Overhaul’

Esaki simplemente tawata un prome impreshon. Mi ta spera cu mi ta ekiboca, locual mi ta duda, tumando na cuenta e cantidad grandi di reacshon desespera di ‘publico’ durante e transmishon riba Facebook. Si esaki ta corecto, ta parce’mi mas cu tempo pa un ‘overhaul’ completo di nos sistema politico.