Scol a habri na Aruba porfin, pero cu algun reto pa atende

ORANJESTAD – Scol na Aruba a habri porfin awe diahuebs, despues di 2 siman ‘extra’ di vacantie, debi na e situacion di COVID19. E Crisis team di COVID a determina cu ta safe pa tur mucha bay scol sin problema. Asina mes a lag’e den man di cada directiva di scol pa habri manera cu nan ta haya ta bon. Tabatin te hasta e posibilidad pa keda cas, si e mayor tabata sinti fastioso of ‘unsafe’ pa manda e mucha cas. Contal cu e mucha haya les alternativo. Dependiendo di e nivel di scol (basico, secundario, avansa) tabata adapta e reglanan y rekisito. 

AWA

Un di e problemanan cu e scolnan a confronta ta cu debi na e situacion di COVID19, a laga kita tur watercooler, como medida di precausion. Pero awor cu scol a habri bek, no tabatin awa na scol, pues mester a pidi tur mayor laga nan yiunan bin scol cu botter di awa, pa asina nan tin awa pa bebe durante orario di scol. 

MAYORNAN PREOCUPA

Algun mayornan a acerca e portal aki indicando cu nan tabatin problema pa hiba nan yiunan scol debi na situacionan medico (p.e. asma) pero cu e cabezante di scol no kier a tende di un forma alternativo pa e alumno en cuestion haya les. Un yamada alternativa na Directie Onderwijs a bisa pa tuma contacto cu Inspectie Onderwijs na e edificio di Ex John F Kennedy.