Buelo humanitario pa Venezuela no ta sigui awe mas

ORANJESTAD – E buelo humanitario pa Venezuela cu mester a tuma lugar awe diahuebs no ta sigui mas. Asina noticiacla a haya confirma. For di diaranson e buelo su ehecucion tabata parce na peliger. Peliger den sentido cu no tabatin siguransa ainda cu e lo sosode. Y awe mainta hefe di rampenbureau Rino Hermans a confirma cu e buelo no ta sigui awe mas ‘ pa motibonan logistico’. Segun minister di husticia Andin Bikker na e portal aki diaranson, tabatin tres instancia ta trahando duro pa algun siman caba pa logra saca e buelo aki di 92 pasahero di cual 25 a paga nan propio pasashi. Hopi di e personanan aki ta forma parti di e grupo di persona cu ta ilegal, y na Warda Nos Costa y cu ta pega riba e isla debi na e problema di COVID19. Tambe e portal aki a compronde cu for di banda di autoridad y gobierno Venezolano, nan a haci tur lo posibel y coopera pa e buelo aki por tuma lugar. E informacion cu e portal aki tin ta cu e aeroliña en cuestion (Laser) a pone pia abou cu e kier wak placa prome cu e buelo sali. Pero e portal aki a compronde cu placa no ta e problema ya cu Hulanda ta yuda financia esaki. Ta mas bien e parti di con y na unda ta paga esaki, debi cu ta trata di un pago na un compania Venezolano. Atrobe, minister Andin Bikker a informa e portal aki cu tanto Directie Buitenlandse Betrekkingen, Directie Luchtvaart y DIMAS ta ‘bezig’ cu e trabounan aki. E intencion tabata pa e buelo sali awe pa Venezuela. Pero a compronde cu esaki no ta e caso mas y cu ta tratando di saca esaki entrante dialuna otro siman awor. 

Loke ta hacie mas fastioso ainda, ta e hecho cu tur esnan cu ta poni pa biaha, mester y a haci nan test di COVID19 manera cu gobierno di Venezuela ta rekeri. Si e buelo no sigui, e testnan aki ta core risico di caduca, pa cual mester haci esaki atrobe, cu tur e gastonan cu esaki ta bin mara cu ne. A compronde cu ta costa por lo menos 15 mil dollar pa saca un buelo asina.