Reunion contra minister a termina sin mocion di desconfiansa

ORANJESTAD -  E reunion Parlamentario publico #28 porfin a termina diahuebs 1'or y cuarto di marduga sin cu a presenta un mocion di desconfiansa contra e minister en cuestion di Infrastructura y Medio Ambiente, Marisol Lopez Tromp. Cu esaki, e esencia di e reunion pa cual el a wordo yama, no a keda logra, esta pa determina si e minister ta goza di confiansa di Parlamento pa e por sigui traha como minister. Por lo menos pa medio di un mocion di desconfiansa. Esaki kier men cu aunke Parlamento no a duna un indicacion ‘oficial’, Marisol Lopez Tromp ta parse di ta keda goza di confiansa di Parlamento y por keda como minister y por lo menos no a wordo baha pa Parlamento. E reunion a mas bien tuma otro rumbo unda cu a bay mas riba e informacion riba actonan coruptivo den varios departamento. Hopi di nan no por a divulga debi cu nan ta den pleno investigacion ainda. De hecho, e unico mocion cu a keda presenta, ta pa obliga e minister pa haci denuncia di tur caso coruptivo, na Ministerio Publico cu a pasa cu 18 pro y 0 contra. 

NI CONFIRMA NI DESMENTI

Loke si a bin sali afo ta confirmacion cu tin hopi casonan andando, sea penal, disciplinario y di otro forma den varios departamento cu ta resorta bou di e minister. E minister no kier a haci mencion di nomber specifico di minister of ministernan envolvi den actonan coruptivo, pero no a desmenti esaki tampoco. Tur esey, pa no daña cierto investigacionan.

CUIDADOSO

E mandatario tabata hopi cuidadoso ora di relata na cierto casonan y tabata mas bien hopi superficial. Sin menciona nomber specifico di trahado of gobernante, e minister tabata referi na cosnan cu a sosode cu e.o. tereno, precario pa kavel di Carnaval y mas. A resalta cu den varios departamento a tuma lugar cosnan irregular y te hasta illegal, unda cu ambtenaarnan tabata presta nan mes pa actonan illegal. Hopi, si no mayoria ta sea bou investigacion. 

KICO TA PASA AWOR

E hecho cu no tabatin mocion di desconfiansa presenta, ni pa miembronan di partido POR sino otro, ta pone e pregunta kico ta pasa awor cu e partido POR. Si esakl ta bay tin efecto riba e partido, esta cu e partido no a sigui su palabra, sino na caminda a dicidi di hala atras y retira e mocion di desconfiansa presenta.