Secretariado di CFT confrontando resistencia na Aruba

ORANJESTAD – E secretariado di College Financieel Toezicht ta confrontando resistencia na Aruba, y esaki por ta strobando nan intento pa investiga e presupuesto di Aruba. Esaki NoticiaCla a compronde, y e ta bin door di e carta cu gobierno a manda diabierna siman pasa, dunando ordo pa ningun departamento di gobierno coopera cu e investigacion di e presupuesto, cu nan ta considera illegal. Esey a pone cu e secretariado no ta hayando cooperacion y como tal tin problema pa haci su trabou. 

For di diamars nan ta na Aruba y a tene nan prome reunion, pero despues di esey, tur porta a sera pa nan y nan ta confrontando resistencia di departamentonan concerni unda cu nan mester haya ayudo. NoticiaCla no por a saca afo si, exactamente cua departamentonan esaki ta, pero a confirma si cu nan ta hayando resistencia.

For di momento cu e Koninklijk Besluit a wordo firma y publica, e comision a biaha pa Aruba y cuminsa haci su trabou. Por lo menos, esey tabata e intencion. Y e tempo cu nan a haya segun e KB, ta maximal 6 siman, minimal 2 pa 3. Cu e resistencia cu e comision ta confrontando aworaki, e tempo menciona no tin garantia di por wordo cumpli cune. No ta conoci ki efecto e resistencia aki por tin pa gobierno di Aruba, y si lo por bin cambio pa cu gobierno di Aruba pa e ‘incumplimento’ aki. NOTA: e foto ta uno di file durante reunion di CFT na Corsou, y e carta ta un copia di esun cu a wordo parti rond di parti di gobierno di Aruba.