Marisol Lopez Tromp no a spaar colega Bikker den di dos tanda

ORANJESTAD – Minister Marisol Lopez Tromp no a spaar colega Bikker den di dos tanda di e reunion di Parlamento durante su disertacion diaranson anochi. E reunion mes cu a keda suspendi dia 31 di juli ultimo, a inicia bek diaranson mainta.Pero tabata apenasdespues casi 10 ora, cu Lopez Tromp a inicia su presentacion di contestacion di e di 2 tanda di e porfin. “Mi ta sintimi practicamente gestraft’ e mandatario a cuminsa na bisa, pa e loke ta e situacion cu e la haya su mes aden. Esta cu e mester a bin defende su mes y su trabou, ora cu e tabata expone cosnan robez. Manera anticipa, e mandatario a duna splicacion riba casonan cu el a bin haya y cu el a atende cu ne. Tur esaki, incluyendo colega minister Andin Bikker. 

PREOCUPA

E mandatario a bisa cu mas cu e la scucha parlamentarionan papia durante curso di e reunion di diaranson, mas e tabata preocupa. Esaki pasobra e rumbo cu e reunion a tuma segun Lopez, no tabata esun corecto. Dado momento el a te hasta bisa cu esaki ta e mundo al revez, pasobra envez di Parlamento bis’e kico el a haci robez, nan tabata cuestiona documentonan cu e la presenta. “Boso tin cu bisami kico mi a haci robez” Lopez a bisa varios biaha durante curso di e dia. Esaki pasobra e no tabata haya cu el a haci nada malo. 

CONTESTA

E mandatario a sigui pa duna contesta unda cu tabata por, unda a purba repasa varios caso cu el a bin cu ne (30 pagina na documentacion) y poco poco tabata presenta nan. Entrenan di e ex director di Serlimar, cu lo a resulta di no tin e documentonan apropia pa su funcion, y cu e mandatario a hasta tild’e di tin un diploma no veridico pa su funcion. Pero asina mes un compania renombra di accountant, a dicidi di dal bay cu ne y scohe pa e bira director. Algo cu parlamentarionan a cuestiona y puntra con por ta cu e compania renombra (Deloitte) a permiti esaki. 

DOCUMENTO

E mandatario a sigura cu no ta 30 documento so tin, sino cu ta mas bien e ‘version’ acualisa di un sin fin di casonan cu el a bin ta haya desde cu el a cuminsa cu su funcion como minister na januari ultimo. E la te hasta tilda Parlamento di ta medio complaciente unda cu a bisa cu e ta haya ‘hopi straño cu Parlamento no tabata sa cu tabatin tanto corucpion andando, siendo cu na 2018 a pasa un mocion pa atende cu e casonan di corupcion cu lo tabatin. “Ma spera di haya sosten di Parlamento” Lopez a bisa, pero a keda mas bien sorprendi pa e actuacion cu lo kier a te hasta bah’e mientras cu e tabata ‘cumpliendo cu su trabou’ di drecha e situacion malo. 

SPIRITO

Pa loke ta e fenomeno di spirito, Lopez a bay asina leu di menciona e cantidad di ‘spirito’, esta personanan cu lo ta registra como trahado, pero nunca no a aparece y cu e no tabata conoce. Den e prome tanda na juli, el a yama e grupo di persona aki como ‘spirito’, pasobra nan no tabata aparece na trabou, niun hende tabata conoce nan, pero nan tabata wordo paga si. Diaranson anochi, Lopez tabata mas specifico y a mustra cu ta trata di 2 persona, di cual uno a admiti y a retira despues di insistencia, y e otro mester a buske na Colombia. Otronan ( a menciona por lo menos 5), ta casonan di personanan cu nan documentacion no tabata corecto pa cual nan a haya prohibicion di entrada. 

ANDIN BIKKER

Loke no a spera ta cu Lopez lo a sigui riba e tema di e proyectonan cu ta regarda su colega minister Andin Bikker, esta di esun pa Warda Nos Costa na Huis van Bewaring na Dakota, y e edificio na Wayaca (Ex Brown Building) cu mester a bay pa polis. A bisa ‘no a spera’ debi cu e reunion di diaranson a inicia netamente cu e presentacion sorpresa di colega minister Andin Bikker, cu a haya ta bon pa bin y presenta y ‘clarifica’ e dos proyectonan ey pa evita cu e lo a haya un bida riba su mes. Tabata den prome tanda cu Lopez a sorprende cu e ‘acusacion’ cu e mandatario lo a actua di un forma no corecto, y a haci mencion di entre otro e forma con a trata e proyecto di HvB. Aki e.o. lo a viola varios regla di bon gobernacion, pa cual colega Bikker lo ta responsabel. Entre nan, cu e contractonan a cana e caminda sin pasa via p.e. DIP, y DOW cu ta departamentonan cu ta resorta bou di Lopez Tromp. E tipo di garantia di banco, no tabata corecto, e clausula di multa no tabata corecto, pues ‘varios cos a bay fout’ segun e mandatario. Mescos ta conta pa e edificio conoci como ex Brown Building na Wayaca cu mester a bira di polis. Aki tambe cos no a bay bon y tambe ta responsabilidad di e minister di husticia. Bikker, den un intento pa drecha e situacion, a defende su mes diaranson mainta y a sigura Parlamento cu tur cos tabata bon haci pues no por papia di algo malo cu e la haci. Lopez anochi a bin bek p’e bisando cu por bien ta cu tin un ley nobo na caminda pa drecha e situacion, pero cu e ley no ta na vigor ainda pues no por usa e angulo ey. De hecho, Lopez no tabatin bon palabra pa colega minister Bikker, no obstante e hecho cu Bikker a purba di clarifica e situacion mas tempran den dia. Ki consecuencia esaki tin pa e relacion ‘nobo’ entre Bikker y Lopez, no ta conoci. Parlamentarionan despues a cuestiona e situacion y a puntra cu si e minister toch a actua robez, si a actua contra dje, si ta bay denunci’e y kico lo para di e minister en cuestion. Pues, basicamente a bolter e asunto unda cu enbez cu Lopez Tromp bira e foco di atencion, esaki a bay awor pa Bikker. E mandatario a termina su disertacion despues di un ora. A sigui un serie di pregunta di Parlamento, cu a nifica cu mester a bay pa un di 3 ronda. Presidente di Parlamento Ady Thijsen a suspende e reunion pa un ora, pa asina duna e minister en cuestion Lopez Tromp, chens pa prepara su contestanan. 

MOCION DI DESCONFIANSA

Remarcable ta cu e di dos tanda a termina sin cu parlamentarionan a presenta un mocion di desconfiansa contra e mandatario. No ta conoci si esaki lo a bay tuma lugar den e di 3 tanda, pasobra manera cu Thijsen a bisa, den cualkier momento, parlamentarionan por a presenta uno. Parlamentario di AVP Mike de Meza a mustra cu mirando cu ningun mocion di desconfiansa a keda entrega, varios di su preguntanan no tin sentido mas y a lague te ey.