Cruz Cora: Proyecto Bek pa Skol cu Style y Animo a tuma lugar den weekend

ORANJESTAD ? Diadomingo ultimo tabata un dia cu Cruz Cora Aruba a dedica na muchanan na Aruba, ya cu nan ta bai bek skol y nos grandinan. E proyecto “Bek pa Skol cu Style y Animo” a cuminsa masha chikito, unda Cruz Cora lo a invita pelukero y barberonan pa por yuda corta cabey di muchanan gratis, pero a resulta di bira un proyecto grandi cu un cantidad grandi di pelukero y tambe salon di beyeza participando. Cruz Cora Aruba por a conta cu mas cu 20 pelukero y barbero cu a tuma diferente shift na Piedra Plat Entertainment Center entre 9’or di mainta y 2’or di atardi. Pero na mes momento, varios salon di beyeza y barbershop a habri su portanan pa atende muchanan y a logra yuda 321 mucha total.  

Na mes momento, e grupo di buddies di e programa pa grandinan di Cruz Cora, Biba Bida tambe a percura pa traha paketenan di cuido y entrega esakinan pa 75 hende grandi na cas cu ta forma parti di e programa. E programa Biba Bida durante e pandemia a mantene contacto via telefon cu e grandinan semanalmente y a sorprende e grandinan cu un pakete na Mei y e biaha aki e buddies mes a deliver na cas y asina cuminda di leu pa alegra nan diadomingo! Cruz Cora Aruba kier gradici tur su Biba Bida buddies pa e colaboracion cu e programa aki.