Thijsen a diferencia di opinion cu AVP y a permiti minister Bikker ta den reunion

ORANJESTAD – Presidente di Parlamento Ady Thijsen a dicidi contra regla di Parlamento, pa permiti minister Andin Bikker pa hiba palabra durante e continuacion di e reunion #28 cu ta trata confiansa contra minister Marisol Lopez Tromp. Apenas un dia prome, Thijsen a bisa den un entrevista na un medio, cu no por trece otro minister sino e minister en cuestion. Sinembargo, cos a cambia diaranson mainta unda cu despues di consulta cu tres lidernan di fraccion di coalicion, a dicidi cu ta permiti Bikker keda. 

DOWERS

E prome pa reclama e situacion, tabata parlamentario di oposicion Arthur Dowers, cu a bisa cu ta violando regla di Parlamento. Despues, lider di fraccion di oposicion (AVP) Marlon Sneek a añadi mas punto riba e reclamo di colega Dowers, recordando Thijsen cu si un parlamentario no kier pa e minister tey, e minister no por tey, segun reglamento di orden. Y no por viola e regla ey. Thijsen a contesta Sneek cu e ta dicidi otro, den cuadro di transparencia y cu pueblo ta exigi claridad y pesey e ta permiti Bikker papia. Ora cu Bikker a papia tabata pa ‘coregi’ cierto declaracionan haci pa su colega Lopez den e prome tanda, cu lo no tabata corecto. Ta trata dos asunto, uno di destaho pa cu e trabou na Warda Nos Costa, y uno di Cuerpo Policial. Pues den e caso aki, Thijsen a ‘overrule’ e reglamento di orden, den ‘interes general’.