Casonan positivo nobo di COVID19 pa Aruba a subi bay di 9 te 98 awe

ORANJESTAD – E casonan positivo nobo di COVID19 a bula bay di 9 caso un dia prome, te na 98, pues casi 10 biaha mas hopi. Y si compronde cu tabatin 257 test, ta 38% di esnan cu a test, tabata positivo. Esaki ta un aumento drastico den un solo dia unda cu atrobe e cantidad ta hera yega 100. Un dia anterior ainda e portal aki a puntra prome minister si mirando cu e cifra a baha te na 9 dialuna, si por papia di cu el a yega e peak y cu esaki awor ta bay baha. E mandatario, contrario na antes, tabata hopi mas cauteloso y a bisa cu e no kier bisa nada ainda y ta warda algun dia mas pasa prome cu determina esey. Y diamars, tabata prueba cu ta bon pa ta cauteloso, compara cu antes ora cu manera cu e cantidad a medio baha, a cora grita cu ta ‘crushing the curve’ y cu nos ta den control. 

HOSPITAL

Manera cu e portal a raporta anterior caba, e situacion mientrastanto di hospital ta keda preocupante pa loke ta e situacion di COVID19. Awe tin dos persona mas cu a drenta  ICU, cu ta aumenta e cantidad di 7 pa 9 , mientras cu 4 pashent nobo a keda interna. Di otro banda tin 6 a bay cas cu tabata riba piso regular special pa COVID. E ta keda un situacion di ‘aan de lopende band’, unda cu pa tres dia sigui, tin entre 4 pa 6 pashent ta drenta. E hecho cu 6 ta sali, ta algo positivo, pero e problema ta cu tin otronan cu ta sigui drenta. Pues e situacion aki ta sigui alarmante.