DIMP: Tin 8.274 plachi di number cu no tin nada paga di 2020

ORANJESTAD – Un total di 14.615 plachi di number na Aruba sea no ta full paga of ta paga mitar aña so. Esey ta 21% di e total di numbernan di auto registra. Asina vocero di Departamento di impuesto Meverly Romano a bisa un grupo di prensa diamars. Aunke cu di e grupo ey, 6.341 plachi ta paga mitar aña, nan ta den incumplimento pasobra no tin chens mas pa paga. Antes por a paga esaki pa cuartal, pues te ultimo cuartal por a paga esaki. Pues e grupo aki de facto den cierto forma aunke a paga mitar aña, tambe ta cay den e grupo di incumplido. E grupo mas grandi di 8.274 ta esunan cu no a paga nada ainda mes! E categoria di number cu mas ta den incumplimento ta esnan di plachi A, cu ta 12.796. For di e grupo aki tin 5296 cu a paga e prome mitar di aña so, y e otro parti cu ta 7500, no a paga nada mes ainda. Romano ta considera e situacion uno serio, mirando cu tabatin 9 luna pa paga, y a haci tur lo posibel pa hasta den temporada di COVID19, ‘come across’ cu tur hende pa entrega numbernan (estilo drive thru) sin cu e ta peligroso pa automobilistanan. Pero ni asina esaki no a yuda. Di otro banda, tin 79% cu si a cumpli cu sigur ta un elogio pa e grupo mas grandi. Manera cu DIMP a anuncia anteriormente, entrante 1 di september 2020, polis a haya notificacion cu por cuminsa duna boet pa esnan cu no a paga nan number di auto ainda. Ademas a manda cobra esnan cu no a paga ainda, completo cu multa di 50% pa incumplimento. Potret ta di archivo di noticiacla.com