Boticanan kier pago diabierna awor di AZV sino tin problema dialuna

ORANJESTAD –Asociacion di Botica na Aruba (BVA) ta duna AZV te diabierna proximo 4’or tempo pa paga 11.5% di e declaracion (placa) di juli 2020, sino nan lo stop di cubri aseguradonan di AZV entrante 7 di september proximo. Esaki kier men cu tur asegurado posiblemente lo mester paga pa nan propio remedi, si nan busca nan remedi dialuna awor, of e botica completo lo por ta cera. Kico exactamente lo por sosode dialuna, no ta conoci, pero lo por tin un of  otro accion segun BVA.  E carta di dos pagina fecha 31 di augustus 2020, a sali di abogado Winfried Kloes na nomber di BVA dirigi na AZV.  

VIOLACION

BVA den e carta, ta protesta contra e accion di AZV di no paga e.o. e 11.5% di suma, cu ta un violacion unilateral di e acuerdo entre AZV y e boticanan, pa no papia mes di tur e otro sumanan cu ta habri ainda. “Partidonan ta den negosacion pa un reduccion solicita di AZV di 5.5%, cu boticanan a informa caba den reunionan anterior, cu ta violacion di nan acuerdo. A bisa mes momento cu nan ta compronde e situacion di crisis y ta dispuesto pa traha hunto pa logra un solucion cu un eventual reduccion di gasto. 

CUMPLI CU PAGO

Segun BVA, AZV recientementemente ainda (e luna aki mes esta 14 di augustus 2020) a bisa boticanan via un carta cu nan (esta AZV) lo paga e pagonan suspendi den juli, augustus y September 2020 respectivamente. Sinembargo segun e boticanan, AZV no solamente no ta cumpli cu esaki pero ta corta mas ainda creando un problema serio di cashflow pa e boticanan. 

NO TUR TA MESCOS

Loke tambe BVA ta critica, ta e hecho cu ta compara tur dunador di cuido, y ta trata nan igual siendo cu esaki no por. E forma con ta compara y ta haci, ta pone cu pa boticanan, e reduccion di 11.5% di placa retene, ta nifica cu nan lo traha sin compensacion. “Nan ta ricibi menos cu e costo di e compra di remedi, pa cual henter e operacion di negoshi mester wordo financia pa e botica. Esaki no ta solamente no rasonabel, sino no realisabel” e abogado ta bisa na nomber di e boticanan. Ta menasa cu boticanan lo mester aplica e regla aki riba pago di remedi na e proveedornan, cu e consecuencia cu e lo por tin un efecto negativo riba e disponibilidad di remedi necesario pa aseguradonan di AZV, y esaki lo ta pa cuenta completo di AZV.  Como tal, mirando tur esaki, BVA a pone e ultimatum menciona di diabierna, sino tin consecuencia dialuna proximo. Por lesa e carta completo AKI.