Dunadornan di cuido ta pone presion riba gobierno pa firma cu Hulanda pa sosten financiero

ORANJESTAD – Den un carta di 3 pagina, por lo menos 8 asociacion medico a bati alarma na gobierno, indicando cu si e sosten structural financiero no yega na sector di cuido inmediatamente, nan lo wordo obliga pa tuma accion pa proteha interes di nan pashentnan y e structura di sector. “Esaki pa evita un colapso completo cu daño irreversible pa e proximo añanan” e carta ta bisa. E carta ta firma pa asociacion di dokter di cas (HAVA), Asociacion di Specialista di Hospital (ASHA), Aruba Dental Association (ADA), Vereniging van Medische Specialisten op Aruba (VMSA) Arubaanse Vereniging van Fysiotherapeuten (AVF), Botica Vereniging Aruba (BVA), Vereniging van Verloskundigen Aruba (VVA) y KP Visser  Orthopedic Technical Center. 

BATI ALARMA

E asociacion menciona ta bisa den e carta cu ‘pa proteha interes di salud publico, dunadornan di cuido y henter nos pais Aruba’ nan ta ‘bati alarma pa duna señal cla cu nos ta wordo horca y cu nos rosea a caba’. Nan ta compronde cu situacion ta dificil y ya caba a demostra di ta solidario door di acepta un corte significante den entradanan, sector di cuido merece un tratamento mas respetuoso den e situacion cu nan ta aden. “Nos a manda varios carta di aviso over di nos preocupacionnan na AZV y gobierno, y nos ta haya hopi lamentable y decepcionante cu no a pone suficiente atencion y mester a caba den un sucedido incomprendibel cu e pagonan di luna di augustus. “Mirando cu situacion financiero ta critico, nos no ta ni pensa kico lo por pasa pa e lunanan siguiente si no bin na un acuerdo cu Hulanda pa sosten financiero structuralmente’. 

URGI GOBIERNO

Di e forma ey, nan ta urgi gobierno di Aruba pa yega na un acuerdo cu Hulanda inmediatamente den e bienestar di salud publico y Aruba, prome cu calamidadnan serio tuma lugar. “Sin e sosten, nos lo no para responsabel pa e riesgonan y lo mester pasa e responsabilidad pa nos gobernantenan” e carta ta finalisa bisando. Por lesa e carta completo AKI.