E deal cu Hulanda den su estado actual, Aruba lo no firma

ORANJESTAD – E manera cu e ‘deal’ entre Hulanda y Aruba ta poni aworaki, prome minister di Aruba Evelyn Wever no ta dispuesto pa acepta y firma. Asina e mandatario a bisa na dos occasion dialuna mainta. Prome den un programa di radio y despues den conferencia di prensa di gobierno. Aunke cu hopi dificultad, e negoshacionan cu Hulanda ta continuando Wever a sigura prensa. Mes momento, na e portal aki sinembargo, Wever a desmenti e punto cu “gobierno di Aruba lo ta purbando di gana tempo pa convence parlamentarionan di e deal cu Gobierno di Aruba lo bay cera cu Hulanda’. Por lo menos, Wever no ta comparti e pensamento ey di e portal aki. Segun Wever, no ta berdad cu pa consumo publico, ta bisa algo, mientras cu en realidad e situacion ta otro. E portal aki, sinembargo tin informacion diferente riba e situacion. 

DEAL

For di fuentenan fidedigno, e portal aki a compronde cu gobierno di Aruba ta practicamente na un punto, cu ni maske e kier sigui purba, ta wak e dificil pa sigui cu Hulanda pa logra cambionan cuantioso cu por beneficia Aruba. Sigur no e cambionan cuantioso cu e por biba cu ne. Y sigur den e tempo cortico cu ta keda Aruba pa keda cla cu un posibel ‘deal’, ta hopi dificil pa logra algo asina. 

ESPACIO PA NEGOSHA 

For di fuentenan fidedigno envolvi cu e negosacionan, e portal aki tin e informacion sinembargo cu a ‘negosha’ tur loke por a negosha caba. De hecho, den e carta pa Tweede Kamer siman pasa un biaha mas, e secretario di estado Hulandes Raymond Knops a reitera esey un biaha mas. No tin espacio pa ‘negosha’ e contenido, pero si por a atende cu e ‘implementacion’ di esaki. Algo cu na Aruba, gobierno di Aruba no kier bisa of admiti. Segun Wever, refiriendo na un publicacion di e portal aki mes, el a acerca Knops y a puntre su pensamento. Segun Wever, Knops a contesta cu ‘nos ta papiando toch?”, cu segun Wever, ta Knops su forma di bisa cu no ta berdad cu no ta negoshando. Segun Wever, Knops a te hasta pone den e carta pa Tweede Kamer, cu ‘nos ta bezig ainda’. Potret ta di archivo. Scucha e intercambio entre e portal aki y e contesta di minister Wever AKI.