Gobierno no tin placa pa paga salaris di september aworaki

ORANJESTAD – “Nos no tin placa pa salaris di September aworaki”. Asina prome minister Evelyn Wever a contesta noticiacla dialuna mainta riba e pregunta di noticiacla.com di con leu e rosea financiero di gobierno ta yega y kico e fecha final ta. Gobierno a bisa luna pasa cu e rosea financiero por caba na September, mas sigur e di dos siman. Y basa riba e declaracion di e tempo ey, a haci e pregunta en cuestion. Y awe un biaha mas, a lo menos cu logra algo di awor pa e momento ey, gobierno lo no tin placa mas. 

NO TIN PLACA

“Nos no tin placa pa Fase, nos no tin placa pa loonsubsidie pa September. Esey ta e realidad” Wever a continua contestando noticiacla. Cu esaki e ta bisa tur cos, esta cu e rosea ta cabando, y si no haya ayudo financiero liher, Aruba ta ‘shut down’ financieramente. Mientras cu e fecha administrativo di placa ta prome siman di September, e fecha real di problema, ta si pa dia 20 di September, no tin placa di ayudo riba cuenta di gobierno. 

META PA KEDA CLA

E meta di gobierno ta pa keda cla ‘linksom’ of ‘rechtsom’, cu e placa pa por cumpli cu salario, cumpli cu loonsubsidie, cumpli cu Fase, pasobra esey ta loke pueblo ta warda riba dje” Wever a sigui bisa. Manera ta conoci, gobierno su fecha di paga normalmente ta riba 24 di cada luna. Como tal, e placa mester ta riba cuenta prome cu dia 24, pasobra esey pues ta e fecha di paga salario. Pero e mandatario no tin pensa di warda e fecha ey yega, y ta premira cu e lo mester keda hopi prome cu esey. Scucha e pregunta y e declaracion di e mandatario AKI.