Un 20% di tur automobilista a paga number di auto 2015 caba

ORANJESTAD – Casi dos luna despues cu departamento di impuesto di Aruba (SIAD) a cuminsa acepta pago pa number di auto di 2015, 20% di nos comunidad a paga nan number caba. E cifra exacto no ta disponibel ainda segun vocero di SIAD, Meverly Romano a bisa NoticiaCla.com awe. Loke tambe ta satisfactorio ta e cantidad di hende cu a paga nan number completo pa 2014, cu ta 97%. Esaki ta nifica cu solamente 3% no a haci esaki (ainda).

E cantidad di auto cu ainda no a cumpli cu e pago ta traduci den 2081 auto, parti den 1702 pa e plachi A, 147 pa esnan V y esnan di motocicleta ta 132, esta MFA. Esaki pa Romano ta precupante pasobra e ta wordo considera hopi, si tene na cuenta cu esey ta nifica cu tin 132 motociclista cu ta coriendo rond cu nada paga di 2014. Manera ta conoci, contrario na auto regular, motociclistanan mester paga nan number di auto di e aña completo. Y esey sigur ta remarcable.

Contrario na añanan anterior, SIAD a permiti automobilistanan pa pasa paga nan number di auto pa e aña siguiente for di e di dos siman di november aña pasa, aunke nan por a ricibi nan plachi entrante 1 di december di 2014. Y esaki a yuda hopi tambe pasobra manera por mira, hopi hende a haci uso di e oportunidad ey. Segun Romano, si antes e periodo druk ta cuminsa na final di januari, ya den december tabatin momentonan druk, y for di awor caba por nota aglomeracion di hende cu ta bin pa paga nan number di auto.

Loke tambe ta diferente, ta e hecho cu awor tin un punto di control extra pa por ricibi e plachi di number. Unabes cu e persona paga su number, e tin cu acudi na un oficina extra, unda cu ta controla solamente e seguro di e auto. Si nan ta coresponde, nan ta haya un stempel di aprobacion y por sigui pa busca nan number. Esnan cu no cumpli cu e parti ey, ta wordo manda bek pa nan seguro pa cumpli cu esey prome. E ta alivia un aglomeracion innecesario na e loket di e plachi mes.

Manera cu dos trahado di e oficina a bisa NoticiaCla.com, añanan anterior, hende por a para trankil 3 ora den rij pa haya nan plachi so. Esey ta despues cu porta nan a para 3 ora caba den rij pa paga. Hendenan tabata para den rij pa haya nan plachi, solamente pa bin tende despues cu nan no por haye, pasobra nan seguro no ta cuadra. Si nan tabata sa esey prome, nan lo a evita di para 3 ora extra den e rij. Y asina tur hende cu acudi na e loket di ricibi e plachi, tin e garantia cu nan seguro ta regla y cu ta un cori esaki ta bira. E ta un sistema cu a funciona te awor, y cu ta mustra di ta trahando bon. “Nos tin cu mira si ora cu cos bira mas druk fin di luna, si e sistema aki por verwerk e drukte tambe” Romano a sigui bisa.