Apenas 9 caso nobo di COVID19 pero 6 hospitalisacion atrobe

ORANJESTAD – Pa di dos sigui ,un total di 6 persona a keda hospitalisa na Aruba pa COVID19. Pues, diadomingo y dialuna cada un, tabatin 6 persona cu a keda interna. Cu esaki e ta trece e total di pashent na 35, di cual 7 ta den ICU y 28 ta isola riba piso general. Esaki ta un situacion preocupante, mirando cu e cantidad ta aumentando. Di otro banda, por ta cautelosamente optimista pa e cantidad abou di casonan positivo nobo cu a keda registra dialuna na Aruba di COVID19. Esaki segun DVG ta ‘apenas’ 9 caso, for di 152 test 31 augustus 2020. Update di awe ta indica cu 3 persona mas a recupera, 9 caso nobo di Covid-19 a keda registra di cual tur ta residente, total di casonan activonan awo ta 1228, total di testnan haci ta 152 (no na aeropuerto).