Warda Costa a confisca pisca di piscadornan local riba laman

ORANJESTAD – Warda Costa a informa diadomingo cu nan a confisca pisca di piscadornan di Aruba cu lo a intercambia of cumpra esaki di piscadornan Venezolano riba laman. Algo cu pa ley ta ilegal. Tabata diabierna 28 augustus 2020 Wardacosta a detecta un boto di Aruba nabegando direccion di awanan territorial di Venezuela. Outoridatnan di Wardacosta por a determina ku e boto aki lo tawata tin contacto ku un boto den awanan territorial di Venezuela. Na regreso di e boto local den awanan territorial di Aruba esaki a wordo detene riba sospecho di ‘overslag’ (pasamento di mercancia di un boto pa otro boto) y transportacion di contrabanda. Durante di controlnan na bordo di e boto ku nomber ‘Charlotte’ a bin constata 6 jug yena ku pisca. For di investigacion preliminar a resulta ku e dos botonan a topa ku otro durante di un ‘rendez vouz’ den teritorio Venezolano pa ‘overslag’ di mercancia, den e caso aki ‘overslag’/benta di pisca. E ‘overslag’ di mercancia riba laman ku botonan extranjero ta prohibi for di cuminsamento di e pandemia di COVID-19 pa motibo ku esaki por trese peliger di transmicion di COVID-19 pa e comunidat Arubiano. E prohibicion di ‘overslag’ ta para den e ministrie?le regeling publica dor di gobierno di Aruba den e articulo 6 lid 1 y 2.

E boto local sospecha di ‘overslag’ y su dos tripulantenan a ser hiba na e pier di Wardacosta pa un investigacion mas amplio. E piscanan a ser confisca riba orden di Fiscal di Ministerio Publico. Normalmente piscanan ku ser confisca ta ser reparti bow di fundacionnan y instancianan local, pero den e caso aki mirando ku e 'overslag' ta ku un boto exterior desconosi, probablemente un boto Venezolano, cual no sa su historia y origin di e pisca, no por tuma e risico pa reparti esaki pa cosumo local. Pa e motibu aki Fiscal den consulta ku Dienst Volksgezondheid (DVG) a ordena pa destrui e piscanan. DVG a atende ku e dos tripulantenan di e boto ‘Charlotte’ sigun e protocol vigente pa e hecho ku e personanan aki tawata den awanan territorial di Venezuela y ku nan tawata tin contacto ku personanan di exterior. E capitan di e boto a ricibi tambe un boet pa violacion di e ministrie?le regeling.

Gobierno di Aruba a saca e ‘calamiteitenverordening’ of ‘ministerie?le regeling’ (AB 2020 NO 126) pa combati COVID-19. E ‘verordening’ ta prohibi e 'niet-reguliere binnenkomst' di mercancia for di laman. E articulo 6 den e ‘verordening’ ta importante pa esnan ku via un manera no-regula ke importa mercancia pa Aruba. E ‘verordening’ a drenta na vigor riba 23 maart 2020 y Wardacosta ta traha abase di e ley aki. Por haya e ‘calamiteitenverordening’ riba e website di gobierno di Aruba.