OM: Toque de Queda ta bek on cu control di polis!

ORANJESTAD - Despues cu diabierna anochi a drenta informacion cu polis lo no actua durante e di dos anochi di Toque de Queda, basa riba decision di OM cu no tin base legal pa actua, esaki a cambia diasabra atardi atrobe. Segun un boletin di OM, Toque de Queda ta 'on' atrobe cu control activo di polis. Segun e comunicado di crisis team y OM, desde 28 di augustus ultimo tin un toque de queda (tdq) na vigor desde mey di anochi te 5'or di madruga den cuadro di medidanan contra Covid.

E tdq ta un di e medidanan necesario cu gobierno ta traha cu ne pa baha e contagio di Covid na Aruba.E medida ta necesario pues pa frena e cantidad di contagio.Di e manera aki ta informa cu KPA lo controla activamente riba cumplimento cu e tdq y cu desde awe fiscal di husticia lo directamente impone un multa di 1000 florin.Ministerio Publico y KPA ta conta riba e bon cooperacion di comunidad pa bringa e crisis di Covid na nos pais.