OM: No tin suficiente base legal pa multa hende durante Toque de Queda awor

ORANJESTAD – “ (Ministerio Publico) no ta mira suficiente base legal pa multa hende den e avondklok actual bao di e omstandigheidnan actual (cu ta otro cu biaha pasa)”. Asina vocero di Ministerio Publico, Ann Angela a confirma pa noticiacla.com diasabra. Esaki ta relaciona cu e hecho cu e di dos anochi di Toque de Queda no a sigui, ora cu polis a keda informa cu nan no por detene ningun hende pa e motibo ey. Intento pa haya reaccion di tanto prome minister di Aruba Evelyn Wever Croes como minister di husticia Andin Bikker, no tabata exitoso ainda. 

KICO TA SOSODE AWOR?

“Awe ta bay tin overleg tocante esaki” Angela a sigura e portal aki, indicando cu lo tin cu determina si e Toque de Queda ta cancela completo of ta ahusta esaki pa toch por tin base legal pa actua. Hecho ta cu for di ayera nochi, cos a dal un buelta di 180 grado ora cu diripente for di KPA a sali un memo interno informando cu ‘debi na circumstancianan no premira, lo no actua durante e Toque de Queda, esta cu lo no detene hende si nan ta viola e Toque de Queda. Cu esaki tambe, e TDQ lo mester a keda cancela. Otro actuacionan regular di polis si lo a continua. 

KICO A BAY ROBEZ

For di momento cu gobierno (lesa: Prome Minister Evelyn Wever Croes) a anuncia diaranson ultimo cu ta re introduci e medida drastico aki, hopi a cuminsa evalua y reacciona riba esaki. Entre nan, e motibo pa tin un TdQ, y tambe e orario cu kier implementa esaki. Esaki siendo cu e mandatario tanto diaranson como atrobe diahuebs mainta den Parlamento, a splica cu e motibo di e TdQ ta pa logra tene e espacio habri na hospital pa pashentnan di COVID19. Si no a implementa e medida, tabatin chens cu e espacio disponibel, lo por a yena debi na caso di trauma, manera accidente di trafico, hincamento y otro situacionan cu e persona(nan) por resulta den hospital y consecuentemente den ICU. Cu esey, e lo a debilita e capacidad limita caba di ICU, y esey no tabata algo cu e crisis team/gobierno kier a experencia. Pero, informacion cu e portal aki tin, ta mustra cu mescos cu cu e biaha pasa, ora cu tabatin e medida, dado momento mester a cancela esaki pasobra e motibo di dje, no tabata hustifica. E cantidad di contagio tabata asina abou, pero kier a mantene e regla debi cu e tabata un bon vehiculo pa controla orden publico. Pero, legalmente e medida aki ta considera como uno extremo, y ta roba e ciudadano di su libertad. Den casonan extremo, por usa un medida asina. 

KICO TA PASA AWOR

Lo tin cu evalua si e medida aki, ta esun mas apropia pa usa, si e ta proporcionalmente hustifica, y/of ki cambio mester trece na dje, sea cu orario diferente y dianan, pa e por tin un cuadro legal cu ta wanta den corte, si detene personanan a consecuencia di e violencia di e regla aki.