Gremionan ta urgi gobierno negosha e miho deal y firma cu Hulanda

ORANJESTAD – Den un carta di dos pagina diahuebs, e tres gremionan AHATA, ATIA y Camara di Comercio a urgi gobierno pa ‘negosha e miho deal y acepta e condicionan poni pa Hulanda, pa bienestar di e isla. Den e carta, e gremionan ta splica e situacion actual, e opcionan cu tin, y e consecuencia di cada paso. E ta un forma hopi simple pero practico pa hende compronde e situacion cu Aruba ta aden. E ta splica e posicion di Aruba, e scenario di fia placa, e proposito di Hulanda y e resistencia politico local. 

OPCIONAN

Den e carta, despues cu ta splica e situacion actual, e gremionan en cuestion ta menciona e dos opcionan cu gobierno tin (segun interpretacion di e gremionan). E prome opcion ta pa ‘negosha e miho posibel acuerdo y acepta e condicionan cu un transicion temporario pa un fundeshi mas fuerte, cu asistencia y supervision di Hulanda’. E otro opcion ta unda cu Aruba ta rechasa e condicionan impone pa Hulanda, y permiti nos economia deteriora mas, perdiendo e capacidad pa paga ambtenaar y otro cosnan manera cuido medico. Esaki segun e gremionan, lo conduci inevitablemente na incumplimento di Aruba riba su debenan local e internacional. Bancarota y desempleo lo aumenta drasticamente y lo tin mas  sufrimento nacional, cu por conduci cu Hulanda tin cu ‘tuma e mando over’, (segun constitucion articulo 43). Unabez cu esaki sosode,  Aruba lo no tin participacion den gobernacion ni Parlamento. E gremionan ta recorda e situacion cu a surgi p.e. na Statia na 2018, unda cu a kita tur poder di gobierno local y parlamento.   

MOTIVACION

E motivacion di gremio pa tuma opcion uno, ta cu e lo pone Aruba den un miho posicion pa recupera y sali aun mas fuerte di e crisis aki, no obstante un periodo dificil di transicion cu ta encera cu nos autonomia politico temporalmente ta compromete. Lesa e carta completo AKI.