Partido POR a cera paz cu su minister Marisol Lopez Tromp

ORANJESTAD – Partido politico POR a cera paz cu minister Marisol Lopez Tromp. Asina e portal aki a haya confirma di su fuentenan fededigno. E anuncio a bin diahuebs anochi durante un reunion di partido (partijraad) digital (zoom meeting). Aki e miembronan di partido a keda informa. No ta conoci si e decision y e paz a cay ayera mes. Esaki kier men cu Lopez Tromp ta keda cu partido POR, y discusionan interno ta termina y a ‘regla e diferencianan di opinion’ internamente. Mes momento ta bin e asunto di e reunion pendiente, y a compronde cu esaki lo continua, pero den un tono completamente diferente. Tambe, a compronde cu no tur den POR ta di acuerdo cu e ultimo desaroyo aki, y cu por spera un split den e partido pronto. Mientrastanto minister Bikker a confirma e noticia y a confirma tambe cu e ta bolbe atende ministerraad entrante awe. 

SITUACION

Mientras cu e detayes di e acuerdo no ta conoci, ta conoci si cu e situacion ta hinca e partido POR den un puesto hopi delicado. Delicado, pasobra hopi ta pensa cu POR door di e episodio aki, a perde confiansa di pueblo, y ademas a perde credibilidad y cu esaki lo no mustra bon pa nan den e proximo eleccion. Den e cuadro ey, hopi ta pensa cu e partido ta morto awor, cu e decision aki, pasobra despues di tanto ‘buya’, e partido ta hala atras y ta aparenta hopi swak. Cualkier decision den futuro, por tin efecto riba e partido. Di otro banda, otronan ta mustra cu e ta un bon decision pasobra e ta mustra madurez y posibilidad di recapasitacion den un situacion di tension. Problema ta, cu e percepcion riba caya, ta cu e partido, ki decision cu cay, lo ta morto. Sea awor of aki un aña ora cu tin eleccion atrobe. Morto, den sentido cu pueblo no ta aprecia cu tin un crisis interno pa e temanan menciona, mei mei di un crisis mundial y cu partido ta mas preocupa cu e situacion interno, cu interes general. Algo cu un grupo grandi lo no pordona e partido. Si cos lo mester a yega asina leu cu partido POR lo a baha nan minister via un mocion di desconfiansa, un grupo di votador lo a ‘reken af’ cu e partido, pa a crea un crisis den un crisis. Di otro banda, si partido keda cu e minister, e otro grupo lo ‘reken af’ cu e partido otro aña, pa no a para firme y core cu su minister cu e no tabata haya bon e momento ey. E unico diferencia ta cu POR ta haya un bida di un aña awor, compara cu un morto awor. Esaki ta pensamento di hopi cu e portal aki a consulta e ultimo simannan aki.