Artistanan local ta rindi homenahe na e baluarte ‘Don Ramon’ Krozendijk

ORANJESTAD – For di momento cu e noticia a plama ayera laat y awe mainta cu e gran baluarte di Aruba “Don Ramon” Krozendijk a fayece, comentarionan a cuminsa plama rond, casi mes liher cu e noticia di su morto a plama. “Don Ramon” manera cu e tabata wordo yama, ta conoci pa e.o. e composicion “Cunucu di Seit”. Tabata na 1982 durante e prome festival Voz-i-Landia, cu e cantica aki a gana prome lugar. Despues e la bira e un di e canticanan clasico na papiamento. Notable ta e cantidad grandi di artista arubano cu e la yuda, sea den forma di compone cancion, poesia of a compaña.

Un di nan cu sigur ta un recuerdo, ta actual director di Relaccionan Exterior di Aruba, Edwin Abath, cu a participa den final di añanan 80 na e festival di OTI cu un cancion co-compone pa Don Ramon. Abath ta un di e promenan cu tambe a recorda su amigo.” Danki pa a co-compone "Mi Viejo", cancion cu a permitimi representa nos pais den e Festival OTI 1989 na Miami.” Abath a bisa riba su pagina facebook.  Minister di Cultura Otmar Oduber tambe a dedica palabra na e baluarte aki “Awe mainta nos a ricibi e tristo noticia cu cultura di Aruba a perde un otro baluarte, Sr. Ramon Krozendijk, kende tabata un compositor y musico hopi stima den nos comunidad. Hopi forza pa henter famia Krozendijk, cu Don Ramon sosega na Paz.”. Otro politico cu tambe a recorda Don Ramon, pa medio di un anecdota ta lider di partido MEP, Evelyn Wever Croes: “Scuchando "Cunucu di Suid" na Blue FM, ta cordami dia mi yiu homber a bin cas ta toca e cantica aki riba cuarta na su 7 anja. Un cancion cu ta describi nos culltura sublimemente. Danki Don Ramon Krozendijk. Sosega na pas den brasa di Senjor”. Edjean Semeleer a yega di presenta algun di e cancionnan di Don Ramon, manera esun popular “Cunuco di Seit”, y tambe a dedica algun palabra. “ Otro GRANDI a bay laga nos . Un Tesoro Nacional cu mi tin hopi respet y admiracion p'e. Semper e ta un gran honor di por canta su creacionnan.” Algun tempo pasa tambe conocido locutora y cantante Nilka Franka a canta e cancion popular di cunuco, cu Don Ramon (wak e video aki).

Un par di aña pasa (2011), e la wordo invita pa Unoca, y esaki ta porta un di e poco potretnan cu tin ainda di dje cu por a haya. Cu Don Ramon Krozendijk, sosega na paz. Foto ta cortesia di Unoca.