Premier Rhuggenaath ta compronde medida di Aruba pa cera bubble

WILLEMSTAD – Mientras cu oficialmente gobierno di Corsou no a haya notificacion ainda cu Aruba ta cancela e ‘bubble’ cu e isla bisiña otro siman, prome minister di e isla en cuestion, esta mr Eugene Rhuggenaath ta haya e medida comprendibel. Asina el a bisa noticiacla.com diahuebs atardi.” Mi por bisa cu mi no a ricibi un notificacion oficial ainda.  Sinembargo mi por bisa cu e medida aki ta comprendibel, mirando cu Corsou a bini cu restriccionnan similar na momento cu e casonan positivo na Aruba a escala” e prome minister a sigui comenta na e portal aki. Aruba a anuncia diaranson anochi cu entrante dialuna awor, ta cera e bubble cu Corsou y Bonaire debi na e situacion di COVID19 riba nos isla. 

CONVIVENCIA 

E mandatario mesora tambe a manda palabra di forza pa su colega di Aruba, Evelyn Wever Croes riba e situacion actual. “Na prome luga mi kier expresa mi combibencia cu nos rumannan na Aruba, y mi colega Prome Minister Evelyna Wever-Croes, cu mi tin hopi contacto cu ne y cu mi sa a haci tur loke ta posibel pa proteha comunidad di Aruba di e menasa di Corona virus. Nos tin Aruba den nos oracion” Rhuggenaath a sigui bisa. 

SITUACION DI CORSOU

E mandatario a repasa tambe e situacion di COVID19 na Corsou.  “Corsou tambe for di siman pasa tin algun caso cu a resulta di ‘local spread’ (personanan contagia local). Esaki por ta motibo pa e medida aki pa loke ta Corsou” e mandatario a sigui bisa. “ Mi no sa si e mesun argumento aki ta valido pa Boneiru. Un motibo mas valido kisas ta si esaki ta un medida general, cu ta conta pa mas pais, pa limita posibilidad di importacion di e coronavirus na Aruba. Mirando e situacion actual di casonan activo na Aruba, mi por compronde un paso asina” e mandatario a sigui bisa. “Mi ta spera di curason cu e situacion aki lo keda domina, tanto na Aruba komo Corsou, y cu nos lo por habri e ‘bubbel’ mas pronto posibel, mirando e importancia pa mantene conectividad entre paisnan di Reino den Caribe pa motibonan familiar, social, cultural y economiko. Aruba y mi colega Evelyna por conta cu mi sosten semper” e mandatario a finalisa bisando.